No.4180/2021-2022         

Aizawl, 4th March, 2022 : Mamit District Sports Complex, Bawngvaa sakna tur hmuna in neitu chhungkaw 18 te leh Mizoram State Sports Council te chuan vawiin khan Aijal Club-ah Inremna an ziak a. He inremna ang chuan in neitu chhungkaw 18 te hian an inte chu chhuahsanin Bawngva VC ten inhmun an pekah an insuan ang a, an in leh huanthlai an pek avanga lawmthu sawi nan MSSC chuan sum fai a pe ang a, an in hmun thara in thar an sak dan tur a ngaihtuahpui dawn a ni.

Hemi puala hun buatsaih kaihruaitu Er. H.Lalzirliana, Mamit bialtu MLA chuan Zoram pum huap pawha hmasawnna lian tham Mamit district-a a awm theih nana Sports Minister Pu Robert Romawia Royte hmalakna chu ropui a tih thu a sawi a ni.

He hun hmanpuitu Sports Minister Pu Robert Romawia Royte chuan Bawngvaa chhungkaw 18 ten an in an pe phal chu lawmawm a tih thu sawiin MSSC-in tuna an chenna aia thaa in thar an neih leh vat theih nan thiam taka ruahmanna an siam chu lawmawm a tih thu a sawi a. Bawngva VC ten in hmun thar tur an buaipui chu ropui a tiin in thar nei turte pawh a lawmpui thu a sawi a ni. Sports Minister chuan “Mamit district hi Mizoram district zinga sports infrastructure nei chhe bera sawi a ni reng thin a. Tun atanga reiloteah erawh chuan Chief Minister zahawm tak Pu Zoramthanga zarah sports infrastructure nei tha district zingah a tel ngei dawn a ni” a ti a. Chapchar Kut ni taka Inremna ziah fel a ni chu a inhmeh em em a ni a ti.      

Pu John Tanpuia MCS, MSSC Secretary leh Pu Lalramthara Bawngva VCP te pawhin lawmthu an sawi a ni.       

Mamit District Sports Complex hi Rs 4400.00 lakh senga sak tur a ni a, hetia inremna ziah a nih takah chuan karleh atanga sak tan tum a ni tih MSSC te chuan an sawi.