No.4179/2021-2022 
Aizawl, the 4th March, 2022: Vawin khan Zotlang Riders, Bullet Club leh Champhai Forest Division tangkawpte chuan kangmei ven kawnga mipui inzirtir nan Zote, Ngur, Vapar leh Hnahlan-ah Awareness Rally an buatsaih.  

Heng khuaahte hian kangmei ven thutiam rual, poster tar leh khawtlang hruaitute titipuina hun an hmang zel a. Bullet Club thawk chhuakte hi mi 36  an ni a, Champhai Zotlang kawn atangin zing  dar 9:30 velah an chhuak a. He hunah hian 'Kangmei ven hi mitin mawhphurhna a ni' tih thupuia hmangin mipuite zirtirna pek an ni. 

DFO Champhai Pu Lalduhthlana, Member Secretary, District Level Fire Prevention Committee chuan Champhai District-ah kangmei a chhuah nasat thin thu leh ramngaw hloh a nasat thu a sawi a. Kangmei ven kawnga mipui zirtirna Awareness Rally, Zotlang Riders ten Mizo te ni pawimawh tak Chapchar Kut ni a kan ram leh hnam chhe zel tur veng tura an rawn pen chhuak chu fakawm a ti a. Sum, hun leh tha tam tak senga rally an nei theih avangin lawmthu a sawi a. Rally hian ramkang ven chungchangah rah tha a chhuah ngei a beisei thu a sawi a. Mipuite chu kangmei ti chhuak lo tura mahni theihna zawn theuha tan khawh theuh turin a chah a ni. 

Champhai District Level Fire Prevention Committee thutkhawm thurel bawhzuiin kangmei hluar leh ven ngaihzual hun chhung hian kangmei laka fimkhur tura inzirtirna, kangmei ven tangkaina leh kang thelh kawnga hriattur pawimawhte leh tul dangte zirtirna kalpui chhoh mek zel a ni a. Awareness Campaign lam hawi programme buatsaih zingah High School Level Essay Writing Competition, Air Rifle Shooting Competition-te buatsaih a lo nih tawh bakah media kaltlanga inzirtirna neih a ni bawk. Kangmei ven kawnga thawk tha khua/veng pathum bakah chawimawi phu khua/veng 3 dangte hnenah lawmman pek leh, kangmei ven kawnga inzirtirna chungchanga nitin chhuak chanchinbu thawhhlawkte tan lawmman siam tum a ni bawk.

Attachment

  • Loading attachment...