No.4179/2021-2022
Aizawl, March ni 4, 2022: Chapchar Kut 2021 chu COVID19 hrileng avangin a lawmna virtual programme buatsaih leh a ni. Vawiin khan Vanapa Hall-ah mi sawm bik tlem te in hun an hmang a. Chief Minister Pu Zoramthanga chu Kut Pa niin, Art & Culture Minister Pu R. Lalzirliana chu Kut Thlengtu a ni.

Kut Pa Chief Minister Pu Zoramthanga chuan kumin kut thupui "Zonun zemawi - Rinawmna" chu pawimawh a tih thu a sawi a. Thiam thil hrang hrang nei, khawvel thleng pawh a langsar pha pawh ni mah ila, rinawmna kan neihloh chuan kan theihna leh thiamna te chawkchhetu a lo nih zawk theih avangin rinawmna kan nun a vawn theuh a pawimawh thu a sawi. Chief Minister chuan Mizoramin tun hnaiah hun khirh tak a paltlang mek thu a sawi a. Hripui leng, ramri buai, kangmei nasa tak te, vawk hri leng, thenawm ram inrelbawlna buai avanga mahni sahimna zawnga rawn lut khawm tam tak nen, economy harsatna nen kan awm dan a sawi a. Harsatna namen lo tawkte hi an dingchhuakin, hlawhtlinna leh ropuina an chang thin tih history atangin hmuh tur a awm thu sawiin, keini pawh harsatna hrang hrangin min tlakbuak avangin kumdanga kan tih thin angin kût kan lawm theihloh phah a. Amaherawhchu heng harsatna te hi mi entawntlaka mi hruailuttu ni turin tangkaia kan hman thiam a pawimawh thu a sawi.

Kut Thlengtu Art & Culture Minister Pu R. Lalzirliana chuan hri leng hun khirh tak kan la paltlang loh avanga a huho a hman theih a la nilo chu pawi a tih thu a sawi a. Hlim taka zavaia la hman theih leh hun a herchhuah thuai a beisei thu a sawi bawk. Mahni hnam a chian a, chawisan nachang hriat a pawimawh thu Art & Culture Minister chuan a sawi a. Kan hnam ziarang kan sawi a bet tlat - Zonun zemawi hrang hrang rinawmna, tlawmngaihna, aia upa zah leh a dangte nunpui a, thu leh hla hlui kan neih te chhawm nun zel ngaihpawimawh tul a tih thu a sawi a. Hnamdang tih dan, an culture leh tawng te kan ngaihsan hma in keimahni hnam a kan chian a, kan ngaihsan hmasak a pawimawh thu Minister chuan a sawi.

Central YMA President Pu R. Lalngheta chuan kut hmang tura kalkhawmte leh mahni awm hmun atanga chhimtute lawmna thu sawiin, thenawm ram atanga raltlan lo lutte chu kut pualin artui pek an nih tur thu a sawi tel bawk a; Organising Committee Secretary Prof. Lalnuntluanga hnen atangin kut buatsaih chhoh dan report ngaihthlak niin, Art & Culture Director Pu R. Hmingthanzuala chuan lawmthu sawiin hun hmasa zawk Live programme hi a khar a ni.