Nimin chawhnu  khan D.C Conference Hall, Mamit-ah District Water and Sanitation Committee on Swachh Bharat Mission ( Gramin) chu an  Chairman Pi Lalbiaksangi, District Bawrhsap ni bawk kaihhruaina-in  thukhawm a ni a, Er. C. Lallunghnema, Chief Engineer PHED cum Mission Director Swachh Bharat Mission (Gramin) bakah PHED hotute  meetingah hian an  tel a ni.

Meeting kaihruaitu Pi Lalbiaksangi, District Bawrhsapin a sawm angin Er. C. Lallungnema, Chief Engineer, PHED cum Mission Director Swachh  Bharat Mission ( Gramin) chuan Swachh Bharat Mission ( Gramin) hnuaia hmalakna hrang hrang sawizauna neiin India ram chu ram hrisel leh fai kan nih theihna turin nasa taka hmalak a ni a,  kum 2019 Oct thla-ah chuan  ram pumpui chu  Pawnlera inthiar awmlohna Open Defecation Free (ODF) a siam tum niin kan Prime Minister zahawm tak pawhin he hmalakna hi a ngai pawimawh hle a ni a ti. Mizoramah pawh  he hmalakna hi nasa taka kal chhoh pui mek zel a ni a, Mamit District pawh ODF District a puan thuai a nih theihnan chak taka hmalakna kalpui niin ODF District a puan thuai theih  a beisei thu a sawi. ODF thiltum leh hmalakna ah chhungkaw tin ten inthiarna him tha tak kan neih vek mai bakah inthiarna hmun tur dik tak,  ekina inthiar    nachang mitinten kan hriat vek chu a thil tum a nih thu a sawi bawk

Pu Lalzawmliana, Sr EE,  PHED Mamit pawhin tun dinhmuna Mamit District chhunga Swachh Bharat Mission hnuaia  hmalakna leh hmachhawpte tarlangin fur khua a nih avanga inkalpawhna lam harsatna avangin duhthusama hmalak a harsat thu sawiin  khuaten han zir chho se  hmabak la awmte pawh chak taka kal chhohpui a beisei thu a sawi. District chhunga Block pathum Reiek, W. Phaileng leh Zawlnuam Block ah hetiang hian hmalakna kalpui tawh a ni.  Reiek Block atanga khaw 22 thlanchhuah ah ekin 607 sak turah 535  sak zawh tawh niin ekin 72 sak  leh tura ruahman a ni a. W. Phaileng Block huam chhunga khaw 23 tlanchhuahah Ekin 2884 sak tura ruahmanah 607 sak zawh tawh a niin ekin 2277 sak tura ruahman mek a ni a. Zawlnuam Block huam chhunga khaw thlanchhuah 44 ah ekin 2299 sak turah ekin 602 sak zawh tawh ni bawkin ekin 1697 te sak tura ruahman mek a ni bawk.

Meeting-ah hian Mamit District ODF a puang tura hmalak tawhna leh hmachhawp hrang hrangte thlirho a ni a, Mamit District chu hnam hrang hrang chenkhawmna a nih avangin ekin ngeia inthiar tura zirtirna chu a theih ang anga khawtlang hruaitute leh tlawmngai pawl te phungbawm a sawmin  hmalak ni se tihte rel a ni.

Meeting- ah hian PHED hotute Aizawl lam atangin Er C. Lallunghnema, Chief Engineer cum Mission Director Swachh Bharat Mission ( Gramin) , Er. H.C Lalnunzira Superintending Engineer Rural Watsan Circle, Aizawl  cum  Executive Vice Chairman SBM(G) Mamit District, Er. K. Zohmingliana, Sr. Eecutive Engineer, PHED ( Rural) cum State Co-ordinator Swachh Bharat Mission( Gramin) te leh Mamit District chhunga PHED officers te, Medical, Forest Department te leh Zawlnuam leh W. Phaileng BDO te an tel a ni.