840/2023-2024

Mamit 17th June, 2023 : Vawiin khan Sub Hqrs. MHIP leh SP Office (DEF) Mamit tangkawpin Mamit khawpui chhungah zuk leh hmuam do leh Gutkha product zuarlo tura inzirtirna Mobile Awareness Campaign neih a ni.

He Mobile Awareness Campaign hi Mamit khawpui chhung kawngdungah neih niin Sawrkar laipui, Ministry of Health and Family Welfare, Govt of India-in The Food Safety and Standards Prohibition and Restrictions on sales regulations 2011 a tihchhuahte leh Mizoram Sawrkarin 2015 May, 28th Gutkha Product hrang hrang a siam anga, zawrh, hralh leh semkual a khap angin, a ti luite hrem an nih tur thute inhrilhhriatna neih a ni a.

Campaign hi Mamit Luangpawl, Lungsir, Field veng, H/S veng, Hmunsam leh Bazar vengah te neih niin kawn remchang laiah inzirtirna hi neih a ni. Mamit SP Office atangin Pu Freddy Lalramthara OC, Pu Robert Lalremruata, SI te bakah MHIP Sub Hqrs atangin Nl Lalzamliani Khiangte leh Pi Laltharzeli te'n hun an hmang a, kan tu leh fa te'n enge an addict tih hrelo nu leh pa kan tam hle a, mihring eitura siam leh buatsaihah Tobacco (vaihlo leh a kaihhnawih) telh chu danin a khap tlat niin sumdawngte pawhin kan ram leh hnam danin a khap leh phalloh sikhar leh tiranga-te zuar tawhlo tura hrilhhriat an ni a, a ti luite chu dan hmanga hremna pek an nih dawn thute an sawi a ni.