Vawiin khan Mizoram State Sanitation Task Force (MSTC) in Mizoram khawpui fai a thlan tura inbuatsaihna a tan Mamit khawpui chhunga Village Coucil hrang hrang parukte chuan an huam chhung theuh-ah vantlang hnatlangpui buatsaih a ni a, vengtina khawtlang hruaitute kaihhruaina-in vengchhung tifai a ni.

Khawpui chhung veng hrang hrang Hmarveng, Venghlun, Bazar Veng, Chhimveng, New Mamit leh Luangpawl ah te hian vantlang inkhawm tawi buatsaih a ni a, Department hrang hranga Heads of Office te chuan District Bawrhsap ruahmanna in he hun hi telpuiin  faina kawnga tanla thar tura infuihna hun leh faina lam pan tura mahni inhlan tharna thutiam neih a ni a, kalkhawmte atangin faina lamhawi thu inziahsiakna ( slogan) buatsaih a ni bawk.  Lawmman te hi Cleanliness Week ah sem a ni ang.

Pi Lalbiaksangi District Bawrhsap chuan Hmarveng Hall-ah he hun hi hmanpuiin khawpui fai inelna hmachhawn turin mimal, chhungkaw tinte tanrualna chuan rah tha tak a chhuah ngei a beisei thu a sawi a, keimahni kan chhungkua faina turin tih theih kan nei a ni tih hre thar leh theuh tur leh faina kawng leh kawng dangah pawh Sawrkar tihtura bikah dah mailova thawhchhuah nachang kan hriat deuh deuh a tul a ni tiin chu chu hmasawnna atan rahbi pawimawh tak a nih thu a sawi bawk a ni.

Pu Narayan Thapa SP Mamit pawhin Chhimveng V.C buatsaih Chhimveng Hall-ah he inkhawm tawi hi hmanpuiin faina thutiam a kaihruaina in kalkhawm ten an nei a ni.

Mamit khawpuiin faina kawnga hma a sawnna tur leh khawpui fai inelna hmachhawn tur hian District Bawrhsap kaihhruaina hnuaia ruahmanna lo siam tawh angin chhungtin, Sawrkar Department, Kohhran, Association hrang hrangte leh Bazar a inzuar thinte tan a tahtawla hnatlan hun siam a ni a. Heng hmalakna tihlawhtling turin hian District Bawrhsap a tanga ngenna siam a ni bawk a ni

Mamit District chhung Census town Zawlnuam khua pawh he inelna a tel tur hian thlan an nih angin  vawiin khan khawtlang hruaitute leh tlawmngai pawl hrang hrang kaihhruaina-in khawtlang huap hnatlang hi neih a ni a, Vantlang hnatlang kalkhawmte hnenah hian  Pu Lalnunfela, Chawngthu BDO Zawlnuam  chuan faina lam hawia tanlakna tur mipui inzirtirna nei  nghalin,  Zawlnuam khawpui-in faina lama hma kan sawn theihna turin mipui tanrualna a pawimawh thu sawiin thawhho puiah a sawm a ni.