Nimin khan Karimganj DC Conference Hall-ah Mamit District Bawrhsap leh Karimganj District Bawrhsap-te chuan ram pahnihte inkara thawhhona tha zawk a awm theih dan tur leh ram venhimna kalpuina kawnga lungrual taka thawhhona tur kawng hrang hrang an sawiho.
Meeting-ah hian ram pahnihte inkara thawhhona tha zawk awmtheihna tur hrang hrang sawiho zingah thing leh mau tawlhruk veng turin DFO leh Range Officer-te tangkawpin Patrolling neih thin ni se, Mizoram leh Assam ramte chu rukru, suamhmang leh hel laka a him theih nan Security Forces te Joint Patrolling neih thin ni se tih te sawiho a ni a. Heng bakah hian ram pahnihte inkara boruak ralmuang zawk a awm theih nan Medili Lui bula Security Post chu tihchangtlun ni se tih a ni bawk.
North Eastern Council hnuaia Mizoram PWD te’n KDZKT Road laih hna kal mekah Assam ram rawn paltlang Contractor te’n bungrua an rawn phurh luhna kawnga harsatna an tawh thin chu Mamit District Bawrhsap Pi Lalbiaksangi chuan committee- ah hian thlenin Assam District Bawrhsap chuan lo enzuia harsatna awmte hi chinfel a nih theihna tura hmalak a tum thu meeting-ah hian a tarlang a ni.
Nimin Meeting hian ram pahnihte inkara ram hmasawnna tur hrang hrang, dan leh thupek kenkawh, ram venhimna chungchangah te thawhhona tha zawk a awm theihna turin a zing thei ang bera inbiakna neih thin ni se tih a ni bawk.
Nimin Meeting-ah hian Mamit District atangin District Bawrhsap Pi Lalbiaksangi, Pu Abhishek Dhania SP Mamit, Pu R.Zirsangliana EE PWD Kawrthah, Pu Lalnunsanga DFO Mamit Division, Pu Lalduhthlana DFO Kawrthah Division, Pu Lalrinawma BDO Zawlnuam, Pu Paul Rokima DIPRO Mamit, Pu Vanlalhmachhuana SDC, Mamit te an tel a,Karimganj District atangin Shri Pradip Kumar Talukdar DC Karimganj, Shri Pradip Ranjan Kar SP Karimganj, Shri Dhrubajyoti Deb ADC(Mag), Shri R.K Laskar ADC (Rev) Karimganj leh Official dangte an tel a ni.
