Vawiin hian Serchhip P&E Venga Leisekawt Field ah Chapchar Kut 2017 chu hlawhtling taka hman a ni a, Sub Headquarters YMA President Pu R. Sanghmingthanga chu Kut thlengtu niin Bawrhsap Dr. Lalrozama, IAS chu Kut Pa a ni.

A hawnna inkhawm tawiah Kut Pa Dr. Lalrozama, IAS chuan, Chapchar Kut hmang tura kalkhawm zawng zawngte chungah lawmthu sawiin kum dang zawng aia kumin Chapchar Kut in Serchhip mipuite ngaihhlut a hlawh chu hmuhnawm a tih thu a sawi a. Chapchar Kut chibai a buk a ni. Kut Pa chuan, hnama min siamtu Pathian hrereng chunga kan hnam zia rang leh nih phungte chawinun zel a pawimawh thu sawiin, puitling ten naupang zawkte hnenah zirtira, kan tu ken faten ngaihhlut nachang an hriat chho zel a tul tak zet a ni a ti. Tin, kumin Chapchar Kut thupui chu “Aia Upa Zah” a nih angin vawiin hian kan aia upa zawkte chunga nungchang mawi leh tha zawk kan neih thar theihna bul ni theuh se a duh thu a tarlang bawk.

Kut thlengtu Pu R. Sanghingthanga pawhin thu sawiin, hnam hi a ral tur a nilova, he hnam ral tur venna a nih chuan a man pek tur chu sang mahse pek kan huam theuh tur a ni. Kan hnam hi humhima a awm zel theih nan a tul apiang kan ti anga, kan ngaihsan zawng leh ngaihhlut zawngte pawh a tul ang zelin tih danglam kan huam mai tur a ni, a ti a. Zofate zingah aia upa zahna nung reng sela, ram nuam tak i siam zel ang u, tiin kalkhawmte a chah a. Kut hlawhtling tak a awm theih nana tha thawhtu leh kut chhimtu zawng zawngte chungah lawmthu sawiin, a kaihhruaina hnuaiah Kut chhimtuten kut chibai an inbuk tawn a ni.

Vawiina Chapchar Kut hi hun thumah thenin hun khatnaah a hawnna inkhawm tawi neih a ni a, hun hnihna ah hnam lam, zai leh hnam zia pholang thei special item hrang hrang sawmhnih leh pali zet neih a ni a. Heng Item hrang hrangte hi Serchhip Town chhunga Branch YMA hrang hrangte, YMA chhang te, Sub-Headquarters YMA Cultural Troup te, MHIP te, MUP te leh zaithiam sawm bik Pu H. Vanlalhlana, Pi Laithangpuii leh Lilzo te an ni a. Serchhip khaw pawn atangin Sailulak YMA Branch ten item pahnih an rawn nei bawk. Heng bakah hian Chapchar Kut Miss thlanna buatsaih a nih bakah Chhawnghnawt Pui neih a ni bawk.

A hun then thumnaah chuan Concert nuam leh hlimawm tak buatsaih a ni.

Vawiina Serchhipa Chapchar Kut hman a nih chhan hi, a hun tura ruat March ni 3 ah, Kut hman nana Serchhipa remchang ber ni thin Leisekawt Field ah Mizoram Presbyterian Kohhran Hmeichhe khawmpui lian Pandal sak a nih tawh vangte, khawmpui atana inbuatsaih chhoh vanglai a nih vangte a, State thuneitute remtihnaa vawiin atana sawn a nih vang a ni a. Hetiang hian a hun hi sawn ni mah se Serchhipa Chapchar Kut hman tawha mipui tel tamna ber leh ropui ber nia sawi a la ni thung a ni.