Vawiin khan Chief Secretary Pu Vanhela Pachuau hovin CS Conference Room-ah Lawngtlai leh Mamit District hmasawnna tur ngaihtuah a ni a, he State Level Coordination Committee meeting-ah hian a kaihhnawih department hrang hrang leh District pahnih aiawhte bakah LADC leh CADC aiawhte an tel a ni.

Ram chhunga Minority Concentration District tanpui ngai zual thlan chhuah zingah Mizoram District 2 - Lawngtlai leh Mamit - te chu thlan ve an ni a, Ministry of Minority Affairs chuan Lawngtlai District tan Rs.24.3 crores leh Mamit District tan Rs.21.6 crores an rawn ruahman a ni. Hetianga sum ruahman sa zulzui hian kawng hrang hranga mamawh phuhru turin heng district 2 te hian District Level Co-ordination Committee enpuina hnuaiah rawtna an siam a. Heng rawtnate hi State Level Coordination Committee te chuan vawiin khan an Chairman Chief Secretary hovin an thlir hova, siamthat ngai laite siam thain sorkar laipuia an thawn thla thuai ang.

Mizoram state-ah chuan Multi-Sectoral District Development Plan for Minority Concentration atana Nodal Department chu Social Welfare Department a ni a. Multi-Sectoral District Development Plan, Lawngtlai leh Mamit District atana siamte hian tui thianghlim intur, zirna sikul in sak leh siam that, eizawnna ngelnghet, thingtlanga harsa zual in leh lo nei lote tana in sak te, electric, kalkawng laih leh siam te bakah Health Sub-Centre leh ICDS project tihphuisui te a tel a ni. He plan hnuaia hmasawnna hnathawh turte hi kum 5 chhunga thawh zawh tura ruahman a ni.