Vawiin khan MZP, Mamit Hqrs buatsaihin Mizo zirlai titha chawimawina neih a ni a. Er. H. Lalzirliana, Bialtu MLA chuan khuallian niin zirlai titha te hnenah chawimawina thuziak a hlan.

He hun khuallian ni-a hmanpuitu Er. H. Lalzirliana chuan Mamit khawpui chhunga zirlai titha chawimawi phu an awm chho ve ta zel chu lawmawm a tih thu sawiin, chawimawina hun buatsaihtu MZP Hqrs. Mamit chungah lawmthu a sawi a. Hun hmasa lamah Mamit bakah khawthlang lam chu zirna kawngah leh thildangah hmuh hniam kan nih thin thu sawiin amah ngei pawhin chutiang harsatna chu vawi tam tak a tawh ve tawh thu a sawi a. Mamit hi mite'n an la hre ve tur a ni tih chu infuih nana a hman thin thu sawiin tuna zirlai mekte pawh Civil Service, Engineer leh a dang te nih tuma tan la tura fuihin, tum satliah nilo tum tak tak chuan kan tan kawng a inhawn thu a sawi. Mahni nihna zahpui lo a, midang an tum lovin, kan nihna phochhuak ngam turin zirlaite a sawm a ni. 

Bialtu MLA chuan tunlai thalaite zingah rilru hrisel lo put avanga harsatna nei, mahni nunna hial pawh la duh awm ang an awm thin chu pawi a tih takzet thu sawiin rilru hrisel nei tur chuan neitu nihna rilru pu a, ka chhungkua, ka khawtlang, ka sawrkar ti-a hengah hian ka tel ve a ni tih kan hriat a pawimawh thu a sawi. Mobile phone khawvelah kan cheng a, nu leh pa zahna kan tlachham ta lutuk hian depression te pawh kan neih phah nasa ta ni-a a hriat thu sawiin heng lakah hian kan inthiarfihlim a, hlawhtlinna chang ngei tura theihtawpchhuah zel turin kalkhawmte a sawm bawk. 

Dr. Lalrozama, IAS, District Bawrhsap pawhin thusawina neiin zirlai titha chawimawi phute chu an thiamna leh finna te chu chhawmnung zela, anmahni tichhetu nilova, mihring puitlinga chherchhuaktu ni ngei tura duhsakna hlanin nu leh pa zahna nen an hmalam hun atan duhsakna a hlan bawk.

He hun hi Tv. Christopher Lalmuankima, President, MZP chuan kaihruaiin Tv. Jacob Lalremruata, Secretary in report a pe a. Tv. Zobiaksanga, Jt. Secy chuan Khuallian leh khualzahawm te chawimawina thuziak a hlan bawk a ni.

Zirlai titha chawimawi te hi HSLC-ah Distinction chin, HSSLC- ah 1st Div leh a chunglam, Degree-ah 1st Division leh a chunglam te niin 1st Division-ah hian mi 42, Distinction-ah mi 13 leh Mizoram pum huapa Top ten a lang mi 7 te chawimawi an ni. Chawimawina hlan tur mi 62 ah hian Covid-19 inkaihruaina SOP in a phal chinin hun hman a ni a. A dang chawimawi tur te hi remchangah hlan an ni leh ang.