Kumin November ni 2 a Sipai lak runpui Mualpui, Aizawla neih tura Mamit District thalai tam zawk an luh theihna tura Pi Lalbiaksangi District Bawrhsap hmalakna leh kaihruaina a din Army Special Pre Recruitment Training thawhhnihna chu vawiin khan zawh fel a ni, He mi pual inkhawm hi Multipurpose Hall 4th IR hmunah neih a ni a, he hun hi Pu Jacob Hlychho, Adjutant Mamit chuan kaihruaiin Pu F. Lalthlamuana SDPO Mamit chuan Mamit District chhunga sipaia intlar tumte hmakhua ngaia District Bawrhsap hmalakna chu fakawm a tih thu sawiin inbuatsaihna hun tlem la awm chu in lama tha taka inzir nana hmang turin Pre Special Training te a chah a ni.

Mamit District chhunga sipaia intlar turte inbuatsaihna a tan hian kumin July 19-23 chhung khan training neihpui an lo ni tawh a, oct 18-21 chhung training hi neihpui leh niin tun tum trainingah hian ziaka chhan chi a inbuatsaihna leh Physical Fitness atan training hi neihpui an ni a, ziaka chhan hi a inbuatsaihna ah hian Pu F. Lalthlamuana SDPO, Pu Jacob Hlychho Adjutant 4IR, Pu Paul Rokima DIPRO leh Pi Lalzikpuii SDC Mamit te chuan zirtirna an pe a ni.

Physical Fitness atan hian 4IR Batalion atangin instructor Hav. Lalthakima, Hav. Rajesh Thapa, Nk. Lalfawnliana leh Personnel 181 Bn BSF atangin zirtirna an pe bawk a ni.

He hunah hian Pi Lalzikpuii SDC Mamit leh Pu Jocob Hlychho Adjutant te chuan sipai intlar turte hriattur leh fuihna thu an sawi bawk.

Army Special Pre Recruitment Training hian Mamit District chhung atangin thalai mi 22 an tel a ni.