No.2474/2020-2020

Lawngtlai, Nikir thla ni 26, 2020: Vawiin khan Mampui Village Level Task Force (VLTF) chuan khawtlang mipuiin an thawh khawm thlai tharte Lawngtlai District Level Task Force (DLTF) kutah an hlan.

Lawngtlai atanga KM 20-a hla Mampui khua hian COVID-19 hri leng vanga Lawngtlai quarantine centre-a awm mekte ei in mamawh phuhruk nan an thlai thar chhuahte chu VLTF hma laknain an thawh khawm a. He'ng chawhmeh leh thei rah an thawh khawm hi vawiin khan Mampui VLTF Chairman/VCP Pu A. Lalhmingsanga chuan DLTF Incident Commander/SDO (Sadar) Pu V. Lalruatliana kutah a hlan a ni.

Mampui Khawtlangin an thawh khawm DLTF kuta an hlante hi antam, maian, tampui, mautuai, phuihnam, zopurun hnah, anthur, iskut, theite leh theihai te a ni a. DLTF chuan thilpek petute chungah lawm thu a sawi a ni.