No.6232/2020-2021

Vawiin, October ni 19, 2020 (Thawhtanni) nileng khan Manpower Development Board Vice Chairman leh Aizawl West-I Bialtu MLA ni bawk Pu Zothantluanga chuan Mizoram leh Assam ramri, Kanhmun khaw bula Medeli - a 5th IR Sipai duty te chu tlawhin, an mamawh thil chi hrang hrang a pek bakah, Mizoram himna tur atana Duty mek Sipai te chu Mizoram leh Mizo hnam tana an hnathawhah lawmthu hrilhin, zam lo leh huaisen taka an hmabak hlen zel turin a fuih. Ramri bula khaw hrang hrang mipuite pawh thlamuanin, an harsatna chu Sorkar-in a hriatpui thu leh lungmuang taka an khawsak zel theihna turin Mizoram Sorkar chuan hma a lak zel dawn thu a hrilh a ni.

Medeli a tlawhnaah hian, Kanhmun leh Bawrai khaw mipui ten Medeili-a Sipai duty dah belh tura Mizoram Sorkar an lo ngenna chu bawhzui sakin, Kanhmun leh Bawrai khaw mipuite ngenna ang hian Mizoram Sorkar chuan Medili-ah hian 5th IR Sipai engemawzat a rawn tirh belh nghal a ni. Vawiin vek khan heng Sipai te Camp tur hi Kanhmun leh Bawrai khaw mipui te chuan hnatlanga siam sak nghalin, hnatlang te thingpui inna atan Pu Zothantluanga chuan Rs. 5000/- a pek bakah, a tul tula hman turin Silpauline tam tham tak a pe nghal bawk.

October ni 17, 2020 (Inrininni) pawh khan Aizawl West-I Bialtu MLA Pu Zothantluanga chuan Thinghlun khaw thlang a 4th IR Sipai duty te pawh tlawhin, 4th IR Commandant leh Mamit SP ten an lo dawngsawng a. Thinghlun khaw thlang; ramri hnaih leh zuala Sipaite duty na tur, Thinghlun khawtlangin an lo siam mek te chu tlawhin, Silpauline thahnemtak a pek bakah, Sanitizer leh damdawi chi hrang hrang a sem nghal bawk a ni.