No.6231/2020-2021

Ni 16.10.2020 (Zirtawpni) khan Anthurium Festival chungchang Tourism Minister Pu Robert Romawia Royte, Tourism Department chuan a pisa-ah Tourism Department hnuaia Commissioner & Secretary leh Officer te nen kumin 2020 hian Anthurium Festival hman dan tur an rel.

Pu Robert Romawia Royte chuan kumin 2020 hi natna hrileng COVID-19 in min tibuaiin, khualzin hipna kawnga hmalak leh mipui kokhawm zawnga hlim hlawp buatsaih chu a remchang lova, chuvangin he festival hi tv leh internet kaltlanga state chhung leh pawna mipui a tam thei ang berin an chhim theih tura hman tum a ni, a ti a. Kumin COVID-19 hrileng avanga hman loh ngawt ai chuan sawrkar dan bawhchhe si lova virtual-a he Festival hi October, 2020 thla tawp lama hman tura rel a nih thu Pu Robert Romawia Royte chuan a sawi a ni.

Anthurium Festival hi kum 2006 atang khan hlawhtling taka hman thin a ni a. A chhim tute tan intihhlimna hrang hrang - Anthurium Show, Cultural Show, Musical Performances, Adventure & Sports, Food Court, Carnival etc. te neih thin a ni. Ministry of Tourism, Government of India chuan Anthurium Festival hmanna tur senso hi Mizoram Tourism hnenaah a pe tawh bawk a ni.