No.6230/2020-2021

Sanitation Core Committee , Hnahthial District chu an Chairman leh District Bawrhhsap ni bawk Pu Vanlalmawia kaihhruaiin vawiin khan a Office Conference Hall ah an thukhawm a, khawpui Fai inelna 2020 hmachhawn mek chungchang an sawiho a ni

Meeting kaihruaitu Pu Vanlalmawia chuan "Khawpui Fai ni tura kan inbuatsaihna ah hian mitinin mawhphurhna hrang hrang kan nei theuh a, chungte chu tha taka kan hlen chhuah theuh a ngai a ni" tiin khawpui fai leh fai lo hmel lanna langsar deuh chu Veng, Sorkar Pisa leh Zirna In te a nih thu leh mahni hmunhma theuh enkawl fai tur kal khawmte a chah a, "Faina hian mawina a ken tel avangin khawchhung khawimaw lai han cheimawi te hi kan rilru ah awm tir zel ila, hmasawnna nasa tak a ni ngei ang" a ti. Mitinte chu intihphur tawn pawimawh a tih thu sawiin "Faina boruak hian kan khawtlang hi hneh se, movement angin i kalpui ang u" a ti. Kawngpui kama hmanraw dah thintute zingah ngawhngawl fal an awm chuan dan anga hrem an hreh dawn loh thu a sawi bawk a ni

Khawpui Fai inelna a Nodal Officer leh SDO (Sadar) ni bawk Pu Lalremruata Sailo chuan tun dinhmunah Hnahthial khawpui chu Faina leh thianghlimna kawngah tanlak thar a ngaih nasat thu sawiin "Department ang pawhin theihtawp kan chhuah dawn a, District Fai ber kan nithei a ni" tiin khawtlang mipuite chu tan la thar turin a chah a, Hnahthial khawpui chhung bika inelna neih mek pawh vawi hnih an endik dawn thu leh a vawi khatna endik chu tunkar Zirtawpni ah an neih dawn thu a sawi bakah thil tul leh mamawh hrang hrang a ngaihna an hai dawn loh thu a sawi bawk.

Sanitation Core Committee member leh SDEO ni bawk Pu Micky R.Lalenkawla chuan Hnahthial khawpui chhung inelna hrang hrang endik dan tur an ruahmante chu kalkhawmte hnenah a hrilhfiah a, Hnahthial khawpui chhunga VCP theuh ten an area a hma an lak tawhna leh hmalak chhunzawm zel dan turte an tarlang bawk a ni.