No.6229/2020-2021

Lawngtlai, Khuangchawi thla ni 19, 2020: Kumin kum tawpa Lai Autonomous District Council (LADC)-a Member of District Council (MDC) inthlan atana hman tur electoral roll ruahman chhin (draft electoral roll) chu vawiin khan Lawngtlai District Election Officer, Lawngtlai Bawrhsap ni bawk Dr Andrew H. Vanlaldika chuan a office chamber-ah a tlangzarh a. Draft roll hi political party ai awhte hnenah a hlan nghal.

Bawrhsap chuan LADC MDC inthlan lo awm turah electoral roll felfai tak a awm theih nan leh dik leh zalen taka inthlan kalpui a nih theih nan political party-te chuan theih tawp chhuah se a duh thu a sawi a. Ram leh hnam khawih thil a nih avangin dik lo taka thil tih hnawl ngam turin party ai awh kal khawmte chu a chah a ni.

Draft electoral roll hi MLA leh MP inthlan neih zawh taka roll behchhana siam niin, February 2020 atanga continuous roll revision chu belh a ni bawk a. He draft roll tlangzarh tak atanga a lan danin, LADC MDC atana vote nei mipa 25612 leh hmeichhia 26179 leh mi dang (third gender) 11, an vaiin mi 51802 an awm a. MDC bial 25 awmah, voter 1250 awmna 4-Cheural MDC Constituency chu voter tlemna ber niin, voter 3466 awmna 20-Sakeilui MDC Constituency chu voter tamna ber a ni thung. Polling station 111 awm zingah, 25/4-Chamdurtlang-II Polling Station-ah voter 75 awmin, an tlem ber a, 1/1-Pangkhua Polling Station-ah voter 1007 awmin, an tam ber thung.

Kum 2015 MDC-LADC Electoral Roll nena khaikhinin, polling station zat hi 103 atangin 8-a pungin tunah 111 a awm mek a. Kum 2015 khan voter 46405 an awm laiin, tunah voter 51802 an awm a, a punna hi voter 5397 a ni.

MDC-LADC draft electoral roll tlangzarh taka sawi duh neite tan October ni 20-22 (ni thum) chhung hun hawn a ni a. October ni 29, 2020-ah final electoral roll chu tar chhuah tura tih a ni.