No.6228/2020-2021

Lawngtlai, Khuangchawi thla ni 19, 2020: Kar hmasa Zirtawpni (16.10.2020)-a Lawngtlai Vengpui-II Village Council area leh Electric Veng Village Council area-a COVID-19 positive pahnih hmuh chhuah a nih avanga Vengpui, Vengpui-II leh Electric Veng village council area-te "Containment Area"-a puan a nih chungchanga hma lakna hrang hrang leh hma lak zui zel dan tur chungchang chu vawiin khan Lawngtlai Bawrhsap pisaah sawi ho a ni.

He hunah hian District Administration, medical, police leh veng pathum VLTF ai awhte an tel a. Bawrhsap Dr Andrew H. Vanlaldika chuan veng pathuma inkhuahkhirhna siam chuan zawm a hlawh thaa a hriat thu sawiin, VLTF leh mipuite thlawpnaah lawm thu a sawi a. COVID-19 kaihhnawiha District mipuite him nan District Administration bakah, health department leh police te'n theih tawp an chhuah avangin mipui tan hlauhthawn tur a awm lo a ni, a ti.

Sr Medical Officer Dr S. Thaizi chuan contact tracing an kalpui dan report pein, tun dinhmunah chuan an chhui zo tawh nia an hriat thu a sawi a. Contact tracing atangin tuna positive hmuh chhuah thar pahnihte nena inhnimhnai (primary contact) mi 132 chhinchhiah an nih thu leh VLTF-te nen inbe tawnin chung mite chu home quarantine vek an nih thu a sawi.

District Hospital Lawngtlai (DHL)-a District Medical Superintendent Dr Zothanpari Chhakchhuak chuan sample lak leh endik an kalpui dan sawi fiahin, Indian Council of Medical Research (ICMR) inkaihhruaina (guideline) milin positive contact-te chu an in-contact hnuhnung ber atanga ni 5 atanga ni 10 inkar chhunga sample lak tur a nih thu leh chumi ang chuan felfai takin sample lak thin a nih thu a sawi a. DHL TrueNAT Laboratory-ah ni khatah sample 25 vel chauh an endik theih avangin sample endik pawh duh angin a chak thei dawn lo tih sawiin, sample lak hun leh test hun chu ngaichang thiam turin VLTF leh mipuite a ngen a. Positive contact sample an test tawh 26 chu a result a negative vek thu a sawi bawk.

Incident Commander/SDO (Sadar) Pu V. Lalruatliana leh VLTF ai awhte'n report pe bawkin, hma lak zui zel dan tur sawi ho nghal a ni a. Tun dinhmunah positive contact atangin case thar hmuh belh a ni rih lo chu thil lawmawm tak a nih rualin, inthlahdah a thiang chuang lo tih tar lan a ni a. Mipuite pawh an fimkhur leh zual a, sawrkarin inkaihhruaina leh fimkhurna dan a zam te chu uluk taka an zawm theih nan VLTF-te paw'n tan la thar se, tih a ni.

He thut khawma thu tlukna bawhzui hian Lawngtlai Bawrhsap chuan hriattirna chhuah nghalin, Lawngtlai Vengpui, Vengpui-II leh Electric Veng village council area-te containment area-a puan a nihna chu a hlip nghal a. Contact tracing-a langte leh home quarantine laite erawh chu medical team leh VLTF-te'n phalna an pek hma loh chuan inkhung chhunzawm tur a ni ang.