No.6227/2020-2021

Aizawl, 19.10.2020: Vawiin khan Chief Minister Pu Zoramthanga, Horticulture Department changtu hovin nikum 2019-2020 chhunga Horticulture Department hmalakna leh kumin kum kallai mek 2020-2021 chhunga hmalakna hrang hrangte thlirhona leh sawihona neih a ni. He meeting CM cabinet meeting room-a neihah hian Department aiawhin Addl. Chief Secretary Pu. JC. Ramthanga, Horticulture Director Dr. Elizabeth Saipari leh Horticulture Department Officer engemaw zat an tel.

Chief Minister chuan Horticulture Department chu kumin chhungah leh a bik takin COVID-19 hrileng kara an hmalakna zarah nasa taka thlai tharchhuah lo pung ta avanga lawmawm a tih thu sawiin, Horticulture Department in Lockdown chhunga Vegetables and Fruits Supply Chain a kalpui avanga kuthnathawktute hlawkna tam zawk an tel chu lawmawm a ti a. Department Officer te chu an thlen chinah duhtawk mai lovin, tha thlah lovin a aia tang leh zuala tan la turin a fuih bawk.

Kumin kum tir atanga tun October thla chhunga thlai langzar zual tharchhuah leh hralh dan hetiang hian tarlan a ni:

1. Tun dinhmuna Dragonfruit tharchhuah zat chu 114 MT niin Cheng vaibelchhe hnih leh nuai sawmthum panga man hralh chhuah a ni.
2. Tomato 345 MT tharchhuah niin, Cheng vaibelchhe thum leh nuai sawm man hralh a ni.
3. Zikhlum 1006 MT tharchhuah atangin Cheng vaibelchhe hnih leh nuai sawmriat pariat man lai lei a ni bawk.
4. Lakhuihthei 1453 MT tharchhuah niin, Cheng vaibelchhe hnih leh nuai sawmnga pathum man hralh a ni.

Dragonfruit, Zikhlum leh Tomato te hi tunah hian thar chhunzawm mek a ni tih thu ngaihthlak a ni bawk.

Vawiin meeting-ah hian Integrated Post Harvest Management Scheme hnuaia thlai tharchhuah sawngbawlna kawnga hmalakna sawiho a ni a. Ripening Chamber/ Thei um hminna khawl 8 MT a lian Sesawng leh Baktawng khuaa dah te chu Balhla leh thingfanghma um hmin nan tangkai taka hman tawh niin, Rural Market leh Pack House-te pawh Mizoram hmun hrang hrangah tangkai taka hman a nih thu ngaihthlak a ni.

Kumin Planting Season chhungin Mau chin lamah SEDP leh National Bamboo Mission (NBM) sum hmang tangkaiin Model bamboo Plantation-ah Mau chin bul tan a ni a, Hmunpui leh Lengpui khuaah chhungkaw 213 in 208 Hactare a zau ah mau chin bul tan a ni tih ngaihthlak a ni bawk a, heng bakah hian kum kal lai 2020-2021 chhunga hmalak chhunzawmna tura ruahmanna siam te thlirho a ni bawk.