No.6226/2020-2021

19.10.2020: Mizoram leh Assam ramri boruak thalo awm chungchangah Chief Minister Pu Zoramthanga chu Union Home Minister Pu Amit Shah chuan rawn bia in, Mizoram leh Assam ramri a harsatna awm chu pawi atih thu hrilhin, boruak tha zawk a awm zel nan theihtawp a chhuahpui tur thu a rawn hrilh a ni.

Union Home Minister bulah hian Chief Minister chuan Assam a cheng mi thenkhatin Mizoram chhung hmun thum ngawt a buaina an rawn siam chu hriatthiam harsa a tih thu leh, Assam a inthlanpui awm tur thlira local politician thenkhatin mipui rilru hruaikawia buaina rawn siam ta nia an ngaih thu a hrilh a. Assam leh Mizoram inkalpawhna kawngpui Assam chhunga dan/block chuan Mizoram mipuite tana nitin mamawh chawkluhna an chhuchat rih tihna a nih avangin mipui ten ei leh bara harsatna an tawh loh nan Tripura leh Manipur bakah thenawm ram Bangladesh leh Myanmar atanga mamawh lakluh dan Mizoram tan chuan zawn mai a ngaih tur thu a hrilh bawk.

Union Home Minister chuan chutiang kawng dang dap ngailo turin he harsatna hi sutkian a nih thuai tur hrilhin, boruak tha zawk a awm thuai a beisei thu a sawi a ni.

Chief Minister hi DoNER Minister Pu Jitendra Singh leh Union Home Secretary Pu Ajay Bhalla in a rawn be ve bawk a. Assam Chief Minister Pu Sarbananda Sonowal pawhin Pu Zoramthanga chu state pahnih te inkara harsatna thleng chu pawi atih thu rawn hrilhin, Assam atanga ei leh bar lakluh kawngah Mizoramin harsatna an tawh lohna turin theihtawp chhuah anih tur thu a rawn hrilh. Chief Minister hi Pu Himanta Biswa Sarma, Home Minister Assam te nen inbe tawh bawkin, boruak muanawm zawk awm thuai se an duh thu an sawi a ni.

Ramri a buaina awmna lamah ram hruaitute thahnem tak an kal tawh a. MLA (ruling leh eptu lam) engemawzat an kal tawh bakah Minister pali - Minister Pu K. Lalrinliana, Kolasib bialtu MLA ni bawk bakah Minister Pu Lalchhandama Ralte, Dr. K. Beichhua leh Pu Robert Romawia Royte te an kal bawk a ni.

Information & Public Relations Minister Pu Lalruatkima chuan he boruak kan tawn mekah hian mipuite hnam anga tangrual tlat tura chahin, nitin mamawh lakluh lamah harsatna awm rih mahse chiai mai lovin leh buhfai pawh tunah kudamah thla thum daih stock a awm thu leh, sawrkarin hma a la zel tih hriatpui bawk tura a duh thu a sawi a. Chutihlai chuan inrenchem thiam turin mipui a chah bawk.