853/2023-2024

Aizawl, 20th June, 2023 : Manipur ram buai avanga Mizorama rawn raltlante chhawmdawl dan tur buaipui tura a bik taka ruat "Executive Committee on Internally Displaced Persons (IDPs) of Manipur" chu an Chairman Pu H. Lalengmawia, Commissioner & Secretary, Home Department hovin vawiin khan Forensic Laboratory Conference Hall, MINECO-ah an thukhawm.

Vawiin meeting hian June ni 5, 2023 a Manipur atanga Mizorama rawn raltlante chhawmdawl dan tur ngaihtuahtu sang "High-Level Committee" thurel bawhzui tawh dan an sawiho bakah, hmalak chhunzawm zel dan tur chungchanga inrawn tlanna an nei a ni.

Meeting kaihruaitu Pu H. Lalengmawia chuan Chief Minister Pu Zoramthanga'n raltlante (Internally Displaced Persons) tanpuina Prime Minister leh Union Home Minister hnena a dil bawhzui tura New Delhi a an zin chungchang report a pe a, Sports Minister Pu Robert Romawia Royte hova sawrkar laipui hotute an dawr kual hnuah hlawhtlin beiseina sang tak an neih thu a report a. Relief Camp awmna district Aizawl, Kolasib leh Saitual District a Deputy Commissioner te leh Central YMA hruaituten raltlante chhawmdawlna kawnga hma an lak dan leh harsatna an tawh te an tarlang a, a sut kian dan tur te sawiho a ni a. Fur khua a in tan tawh nen raltlante tawmhulna tur temporary shelter sak chawp hman ai chuan sawrkar hmunhma remchang luah tur zawn tha an ti bawk.

Raltlan zingah dam lo leh natna khirh tuar te enkawl dan tur mumal tak ruahman a tul thu meetingah hian tarlan a ni a. Health Department official ten raltlante hriselna dinhmun an vil dan leh damlote an buaipui dan report an pe a. ICDS nen tang tlanga raltlan naupangte eitur tha an pek thin thu tarlan a ni bawk.

Vawiin thukhawm hian raltlante chhawmdawlna tur sum leh pai a theih ang anga dap dan ngaihtuah ni se an ti a. MLA zingah leh sawrkar hnathawk zingah raltlante tana sum leh pai thawh thei an awm chuan hmalak ni se an ti bawk. School Education Department report ah raltlan zirlai 1500 chuang Mizoram chhunga sawrkar sikul hrang hrangah admit an nih thu tarlan niin, raltlan zirlai admission ti duh ten document an neih loh pawhin an dinhmun hriatthiam sakin ngaihnathiamna an nei tih tarlan a ni bawk. Higher Education zirlaite chungchang pawh hmalak mek a nih thu tarlan a ni.

Raltlante chhinchhiahna mumal leh felfai tak siam tura HLC thutlukna lo awm tawh sa bawhzui zel dan tur sawiho a ni a. Home Department leh ICT Department ten tanghovin hma an lak mek tih thu tarlan a ni a. Raltlante buaipui tur District leh Village Level Committee siam tura HLC in thutlukna a lo siam tawh bawhzuiin a inkaihhruaina dan leh a ruangam mumal tak nen Home Department in an ruahman mek thu tarlan a ni.