366/2023-2024
Champhai, the 8th May, 2023: Manipur State tualchhung buaina avanga mahni sahimna zawnga raltlan rawn lut Mizoramah an awm mek zel avangin Champhai District Bawrhsap, Pu James Lalrinchhana chuan he buaina avanga Champhai District-a lo lutte chu an rawn luhna huamchhunga Village Council-te'n lo ngaihven a, a tul anga lo chhawmdawl turin vawiin khan ngenna leh hriattirna a chhuah.
Thuchhuah chuan Champhai District chhunga khua/veng chhunga Manipur mi leh sa awmte'n harsatna an tawh loh nan leh boruak ralmuang a awm zel theihna tura theihtawp chhuaha hma la turin Village Council, Sub-Headquarters YMA, Champhai leh Branch YMA tinte a ngen a. He tualchhung buaina avang hian mitinte Social Media (facebook, instagram, twitter, whatsapp etc.) hman dan kawngah fimkhur lehzual turin a chah a. Hnam leh hnam inkara buaina chawkchhuak thei leh boruak duhawm lo thlen thei zawnga thu engmah post lo turin mipuite a ngen bawk a ni.
Hemi chungchangah hian harsatna emaw, report tur nei emaw tana biakpawh theih rengna tur phone number District Bawrhsap chuan hetiang hian a ruahman:
1. BDO, Champhai - 9862614255
2. BDO, Khawbung - 8414050669
3. SDC (Nodal Officer), DC Office, Champhai - 8259051055
District Bawrhsap Pu James Lalrinchhana chuan Champhai District chhunga Village Council tinte chu nitin raltlan neih dan kimchang chawhnu dar 2 ral hmaa bialtu BDO ah reporting format duan sa hmanga thehlut thin tur leh, BDO tinte pawh report an dawnte phuahkhawma chawhnu dar 2:30 ral hmaa DC Office-a thehlut thin turin a hriattir bawk a ni.
