365/2023-2024
Aizawl, 8th May, 2023 : Manipur buaina chhuak vanga Mizoram mi leh sa tangkhang te hruai haw tura Mizoram sawrkar hmalakna (situation update) Home Commissioner Pu H. Lalengmawia’n a sawifiah (May ni 8, 2023 @ 7:00 PM)
1. Vawiin khan Guwahati atangin mi 34 lirthei hmangin tluang takin Aizawl an rawn haw thleng a, an rawn haw kawngah Silchar DRC, Vairengte SDO(Civil) ten an lo hmuakin an lo dawngsawng a, Kolasib-ah Supply Minister Pu K.Lalrinliana leh Kolasib DC Pu John LT Sanga ten an lo hmuakin thinpui an lo inpui a, an chungah lawmthu kan sawi a ni.
2. Vawiinah vek khan Kolkata atangin mi 52 thlawhtheihna hmangin Lengpui airport an rawn tum a, Lengpui airport-ah hian Mizoram sawrkar aiawhin Social Welfare & Tribal Affairs minister Er. Lalrinawma, H&FW Board Vice-Chairman Dr ZR Thiamsanga, Aizawl Deputy Mayor Pu R. Thanglura, Home Department Additional Secretary Pu Joseph H. Lalramsanga bakah Central YMA hruaituten an lo hmuak a, anmahni lo lawmna in khawm Lengpui airport-ah hian neih a ni.
3. Lengpui airport-a anmahni lo lawmna inkhawmah hian Manipura All Mizo Students Union (AMSU) President Immanuel Lalngaihmanawma’n thu a sawi a, hetah hian chiang taka a tarlan a awm a, inmawhpuhna leh indemna tawngkam mak tak tak a tam a, Mizoram sawrkar chu Manipur Atanga a mi leh sa lakchhuahna kawngah a tuan a fum lua a ni han tih te pawh a awm thin a, AMSU President hian chutiang a lo nih loh zia leh M izoram sawrkar pawhin theihtawp a chhuah a, mizo zirlaite rual tho in state dang zirlaite pawh Manipur chhuahsanin an chhuak chauh a ni tih a sawi kha hre theuh ila ka duh a ni.
4. Naktuk thawhlehni (May ni 9, 2023) hian mi 29 ten Imphal atangin Guwahati an pan leh dawn a, nimin olamah khan mi 28 tiin kan sawi a, amaherawhchu vawiinah mi pakhat ticket book sak leh a nih avangin mi 29 ten Imphal chhuahsanin Guwahati an pan dawn a. Ticket kan book sak zawng zawng pawh 197 an ni ta thung a ni.
5. Tuna ticket kan han tihfel sak sa te bakah hian midang Imphal damdawi in thenkhata inenkawl mek te leh Mizoram mi leh sa dik tak la in report lo hrim hrim mi 68 kan hmuchhuak thar leh a, heng te hi vawiina kan han hriat thar, rawn in report thar an ni. Heng mite tan hian ticket book turin nilengin theihpatawp kan chhuah a, airlines hrang hrangah kan bei a, Civil Aviation Principal Consultant Wing Comdr Pu Joe Lalhmingliana leh a nau te pawhin theihtawp an lo chhuah ve bawk a; keini Home department bakah kan Chief Secretary Pi Renu Sharma pawhin ngawrh takin heng mi 68 te hruai haw tur hian thlawhtheihna ticket kan zawng char char a ni.
Nimahsela vanduaithlak takin tun thleng hian kan hlawhtling thei lova, a pawi kan ti hle a, thu thang eng engemaw – airlines thenkhatah ticket awl a awm tih te pawh a awm maithei, heng kan hriat te pawhn hi kan han check a, system a lang pakhatmah a awm thin lo a, a rawn lan pawhin mitkhapkarlovah a in block leh zel a, hetiang a nih avang hian heng mi 68 te tan hian ticket kan la book thei lova, an hriatthiamna kan dil tak meuh a ni. A remchang hmasa berah book thei turin travel agency te office-ah Home department official ten an awm chilh a, anmahni te nen hna kan thawk tlang a, kan bei reng dawn a ni.
6. Internally Displaced Persons (Manipur atanga sahimna zawnga Mizorama rawn lut) report kan dawn hnuhn ung ber hetiang hi a ni :
Aizawl District - 402
Champhai District - 59
Kolasib District - 757
Serchhip District - 4
Khawzawl District - 7
Saitual District - 827
Total - 2056
Heng kan u leh nau rawn lut te hian a theih ang anga remchang dapin an chhung leh khat, laina hnaite an rawn bel a, an chenna hmun tur te hi buaipui zung zung a ngaih avangin District hrang hranga district thuneitu ten ruahmanna an siam zung zung a ni tih ka tarlang duh a ni.
7. Chief Minister, Home Minister, Chief Secretary leh department hrang hranga kan thawhpuite, YMA, tlawmngai pawl zawng zawng te leh zirlai pawl ten theitawp kan chhuah mek reng a, kan mim leh sa te an him kim hma loh chuan theihtawp kan chhuah zel dawn a, mipuite pawhin min thlawp zel turin kan ngen bawk che u a ni.
