364/2023-2024

Aizawl, 8th May, 2023 : Tunhnaia Manipura buaina chhuak avanga Mizoram mi leh sa tangkhang, Mizoram sawrkar hmalakna a hruai haw mi 52 ten vawiin chhun dar 12 :00 khan tluang takin Lengpui airport an rawn thleng a. Lengpui airport-ah hian Mizoram sawrkar aiawhin Social Welfare & Tribal Affairs minister Er. Lalrinawma, H&FW Board Vice-Chairman Dr ZR Thiamsanga, Aizawl Deputy Mayor Pu R. Thanglura, Home Department Additional Secretary Pu Joseph H. Lalramsanga bakah Central YMA hruaituten an lo hmuak a ni.

Lengpui Airport-ah tangkhang lo haw te pual hian inlawmna in khawm buatsaih a ni a. He inkhawmah hian minister Er. Lalrinawma chuan Manipur a chi leh chi inkarah buaina chhuak hian Mizoram mipuite a barakhaihin an rilru a tin a hle tih sawiin buaina chhuah tantirh khan sawrkarin theihtawp chhuahin hma a la nghal a, Chief Minister Pu Zoramthanga pawhin Manipur Chief Minister be nghalin remna leh muanna Manipur-ah a awm theihnan theihtawp chhuah a in huam thu a han hrilh a, chu mai ni lovin Union Home Minister Pu Amit Shah pawh be nghal in theihtawp chhuah turin a ngen bawk a, chutih rualin Mizoram sawrkar chuan Mizoram mi leh sa Manipur a awmte lakchhuah dan tur nasa takin a ngaihven nghal a ni, a ti.

Minister chuan Home Department Official ten theihtawp chhuahin office chawlh pawh nei lovin kan mi leh sa te rawn haw theihna turin tan an la tih sawiin tangkhang rawn haw duh in report mi 196 te thlawhtheihna ticket laksak an nihn thu a sawi a. Nimin May ni 7, 2023 (Pathianni) zing lam dar 1: 40 AM khan Imphal chhuahsan in tluang takin zirlai 50 Guwahati thlawhna hmangin hruaithlen an ni a, Guwahati a Deputy Resident Commissioner in a tul ang angte a lo buaipui a, a lawmawm takzet a ni a ti a. Heng mi 50 te hi Guwahati Mizoram House ah an chawlh hahdam hnuin Pathianni vek, tlai dar 5 khan zirlai 25 te chu Mizoram lam panin bus in an rawn chhuak leh a, Zirlai 25 dangte chu kawng dangin Mizoram an rawn pan ve leh a ni, a ti.

Vawiina kan hmuah, tluang taka rawn thleng ta mi 52 te hian nimin Pathianni tlai dar 4: 10 PM khan Imphal chhuahsan in Kolkata tluang takin an thlenga, Joint Resident Commissioner hovin an lo dawngsawng a, Kolkata Mizoram House a thawktu te zawng zawng chungah sawrkar chuan lawmthu a sawi tak meuh meuh a ni, a ti a. Anni hian vawiin dar 10:30 AM hian Kolkata chhuahsan in Mizoram an rawn pan a, tluang takin an rawn thleng thei a, a lawmawm hle a ni, a ti.

Tangkhang rawn haw te aiawhin Immanuel Lalngaihmanawma, AMSU President, RIMS a MBBS Final Year zirlai chuan thu a sawi a, Mizoram sawrkarin a ngaihvenna ah leh a buaipui danah sawisel tur leh vuivaibna engmah kan nei lo tiin thinlung takin rawn haw te aiawhin lawmthu a sawi a. Social media thenkhatah Mizoram sawrkar che muang leh hma la that awk lo anga demna awm chu a dik lo tih sawiin pawi an ti takzet tih a sawi a, RIMS zirlaite zingah phei chuan state dang zirlaite nen an chhuak rual reng a, Mizoram sawrkarin chak taka hma a laksakna ah lawmawm an tih thu a sawi a ni.

Vawiina Mizoram rawn thleng te hi RIMS a zirlai mi 37 leh chhan hrang hrang vanga Imphal-a tangkhang mi 15 an ni a. Nimin tlaia Guwahati atanga bus hmanga rawn haw mi 25 te pawhin Aizawl tluang takin an rawn thleng tawh bawk a ni.

Inlawmna inkhawm kaihruaitu Pu Joseph H. Lalramsanga, Additional Secretary, Home Department pawhin sawrkarin Mizoram mi leh sa tangkhangte hruai haw tura hma a lakna kawngah theihtawp a chhuah reng a, tha thlah lovin tan an la zel dawn tih sawiin, hruai chhuah ngai la in report lo an la awm thei a, damlohna avanga inentir tangkhang engemaw zat an la awm bawk a, chungte tan chuan Sawrkar chuan Mizoram him dam taka an lo thlen theih nan theihtawp a chhuah zel dawn tih a sawi a ni.

Sawrkarin ruahmanna a siam dan chuan vawiin hian Indigo, Air Asia leh Air India thlawhna hmangin mi 37 te Imphal chhuahsan in Guwahati an pan leh ang a, naktuk thawhlehni hian Indigo, Air Asia leh Air India thlawhna hmangin mi 28 te Imphal chhuahsan in Guwahati an pan leh bawk ang.

Manipur mi leh sa, an himna zawnga Manipur chhuahsan a lirthei hmanga Mizoram a rawn tlante chu Sawrkar chuan theihtawp chhuaha lo dawngsawng turin DC te hnenah hriattirna a chhuah tawh bawk a ni.

Vawiin inlawmna hunah hian Dr ZR Thiamsanga, MLA, H&FW Board Vice-Chairman leh Pu R. Laln gheta, CYMA President ten thu an sawi bawk a ni.