352/2023-2024
Aizawl, 7th May, 2023 : Manipur buaina chhuak vanga Mizoram mi leh sa tangkhang te hruai haw tura Mizoram sawrkar hmalakna (situation update) Home Commissioner Pu H. Lalengmawia’n a sawifiah (May ni 7, 2023 @ 7:00 PM)
1. Tukin zing (May ni 7, 2023 ) khawvar hma dar 2:16 AM khan Imphal atangin zirlai 50 Guwahati-ah thlawhtheihna hmangin tluang taka hruai thlen an ni a. Guwahati DRC leh a thawhpui ten Guwahati airport-ah help desk te siamin tha takin an lo dawngsawng a ni.
Guwahati atangin Mizoram House ah him dam takin hruai thlen an ni leh a, an chauh deuh avangin chhun lamah hahchawlh tir an ni a. An zinga mi 25 te hi vawiin tlai dar 5:00 khan bus in Mizoram lam panin an rawn chhuak a, anmahni lo dawngsawng a lo buaipui turin Silchar DRC, Vairengte SDO (Civil) leh Kolasib DC te hrilh an ni tawh. Midang 25 bus a rawn chuang ve lo te hian kawng dang dapin Mizoram rawn haw an duh niin kan hre bawk a ni.
2. Vawiin tlai lam dar 4:10 khan zirlai dang mi 81 ten thlawhtheihna hmangin Imphal an chhuahsan a, dar 6:10 PM khan Kolkata airport tluang takin an thleng bawk a ni. JRC, Kolkata leh a thawhpuiten Kolkata airport ah lo dawngsawngin ruahmanna fel tak an lo siam a, an riahna tur thlengin an lo tifel vek a ni. Anni hi naktuka Mizoram lama an rawn thlawh chhuah nghal theih nan ruahmanna a theih chen chen kan siam a, an tan bik hian thlawhtheihna Mizoram Aviation hotuten an ngaihtuah mek a, Indigo flight bia in hlawhtlin ngei pawh an inbeisei a ni. Tluang taka kan kal theih chuan naktuk chawhma dar 10:30 ah an rawn thlawh chhuah beisei a ni. Tluang taka an rawn thleng turah kan hisap a, Lengpui airport an rawn thlen hunah anmahni lo hmuak a, lo lawmna hun Lengpui airport ah sawrkarin buatsaih a rel a. Social Welfare & Tribal Affairs Minister Er. Lalrinawma hovin official te leh NGO hrang hrang ten he hun hi an hmanpui ang.
3. Tukina zirlai Guwahati thleng ta te leh zanina Kolkata thleng ta te hi an zavaiin 131 an ni a. A bak la tangkhang te lak chhuah dan tur chu hetiang hian ruahmanna siam a ni.
- Naktuk thawhtanni (May ni 8, 2023) hian mi 37 in Imphal chhuahsanin Guwahati an pan ang.
- Naktip thawhlehni (May ni 9, 2023) ah mi 28 in Imphal chhuahsanin Guwahati an pan ang.
- Thawhlehni tlai lamah chuan thiarchhuah tur record (in report) kan neih sa mi 196 te hi kan thiar chhuak kim tawh turah kan inngai a ni.
- Report hmasa lamah thiar chhuah tur zat hi 198 niin kan sawi a, mahse 196 a lo ni zawk a, a chhan chu an zinga mi 2 hi anmahni remchanna lo awm nen sawrkarin kan hriatpui lem lohin an lo in tifel tawh a ni.
4. Hetih lai mek hian Mizoram mi leh sa ni lo, Manipura khawsa kan unaute sa himna zawngin an rawn lut mek a, vawiin tlai dar 5:00 thlenga report kan dawn dan chu hetiang hi a ni :-
Aizawl District - 151
Kolasib District - 228
Saitual District - 217
Total - 596
5. Chief Minister, Deputy Chief Minister, Home Minister, Chief Secretary leh department hrang hranga kan thawhpuite, YMA, tlawmngai pawl zawng zawng te leh zirlai pawl te chungah vawiin thlenga lungrual taka Mizoram tan, Mizo hnam tana kan thawh tlanna ah lawmthu kan sawi a ni.
