State Election Commission chuan ni 13th April, 2012 khan  May ni 3, 2012-a Mara Autonomous District Council inthlanpui vawi 10-na  neih tur a nih thu a puang a, hemi ni vek hian inthlanpui neih a nih tur thu Notification chu Governor-in a ti chhuak a, Election Schedule tarlanna  Notification pawh State Election Commission in a ti chhuak zui bawk a ni. He inthlanna lo awm tur atana inpuahchahna hrang hrang chu tluang taka kalpui chhoh zel a ni a, May ni 3, 2012 a inthlanna neiturin a hnuaia tarlan ang hian ruahmanna engkim peih fel a ni ta.

  1. He inthlanna tur atana Final Roll chu ni 10.4.2012 tihchhuah a ni a, he Final Rolls ang hian Electors 32,898 an awm a, voters 15, 875 te hi mipa an ni a, 17,023 te chu hmeichhia an ni thung. Constituency-wise a Electors tamna ber chu Saiha East-II niin 2211 electors an awm a, Electors tlemna ber chu Rawmibawk niin 855 electors an awm a ni.
  2. MADC hnuaia Constituency 25-ah inthlanna hi neih a ni ang a, Polling Stations 67 awmin Polling  station zinga a electors tamna ber chu Meisavaih niin 1176 electors an awm a, a tlemna ber chu Supha niin 53 electors an awm thung a ni.
  3. Nomination file-tu zawng zawng hi mi 82 an ni a, inhnuhdawk leh mi 15 an awm a, tichuan contesting candidates chu mi 67 an ni. Heng zinga pa 2 chu hmeichhia an ni.  Party hrang hrang candidate neih dan chu hetiang hi a ni - INC - 25, MDF-12, MNF-12, ZNP- 3 ,IND-15.
  4. State Election Commission chuan Election Observer 3 (pathum) a ruat a, chungte chu:- 1. Pu Sangdingliana  MCS, Director, LAD, 2. Pu Lalhmachhuana MCS, Project Director, SLMC 3. Dr. H. Lalthlangliana MCS, Jt. Director, Transport Department te an ni. An ni hian Scrutiny of Nomination neih ni atangin an mahni bial chan bik an vil nghal char char a, vote thlak ni thlengin Saiha-ah an cham chilh dawn a ni.
  5. He inthlanpui atana Returning Officer chu Pu Kunal IAS, Deputy Commissioner, Saiha District a ni a, Asst. Returning Officer  2 awm in Pu Vanlalngena, Addl DC leh Pu N.Chakhai PD, DRDA te an ni.
  6. Sector Magistrates atan mi 5 - Pu N.Chakhai, PD, DRDA, Pu Vanlalngena, Addl. DC, Pu Donny Lalruatsanga, DTO, Pu K.Lalnuntluanga, BDO (T) leh Pu Zothanmawia Khiangte, SDC te ruat an ni a, an ni hian bial chan bik neiin ni 2.5.2012 atang hian an bial theuh ngun takin an vil ang a, vote thlak zawhah polling party hnuhnung berte Saiha-ah an escort haw dawn a ni.
  7.  Model Code of Conduct khauh taka kenkawh zel a ni a, complaint 8 dawn tawh a ni a, 3 chu chinfel tawh a ni a, 5 dang chu enfiah mek a ni. A bik takin campaign period a tawp hnu a Model Code of Conduct bawhchiat a nih loh nan District Magistrate chuan Cr.PC section 144 tlawhchhanin khapna thupek hrang hrang a ti chhuak a, vote in lei sak leh vote inthlak sak a awm loh nan nasa taka tan lak a ni.
  8. He inthlan a hman atan hian ECI-EVM 92 ruahman a ni a, 67-te chu Polling Station-a vote thlakna atana hman an ni anga, 4-te chu Training atana dah niin, reserve-ah 21 dah a ni. He inthlana EVM sawngbawl danah hian tun hmaa la tih ngai loh, sawiselna neuh neuh a awm avanga tun hnaia ECI-in additional safety measure lak tura a tih zawng zawng chu lak vek a ni a. Pink paper seal hman a nih mai bakah First Level Checking atangin Political party-te phungbawmah sawm zel an ni.  EVM Strong Room hi State Armed Police (SAP) 25 -te venhimna hnuaiah vote chhiarfel a nih hnu thlengin dah a ni anga, Strong Room Security protocol mumal tak hnuaiah venhimna hi kalpui a ni dawn a ni.
  9. He inthlanna buatsaihtu tur Presiding Officer 67 leh Polling Officer 134 an awm a, an vaiin mi 201 an ni.  Heng Polling Official-te bakah hian venhimna lama hnathawktu Police mi 239 an awm bawk dawn a ni.
  10. Polling Official-te leh Election Official-te hman atan motor  LMV-53, MMV-3, a    vaiin 58 ruahman a ni.
  11. Polling Station venhim uluk ngai zual bik Vulnerable/Hyper-sensitive Polling Station a awm lova. Tlem a venhim uluk ngai zual Critical/Sensitive Polling Stations pa 4 (pali)  a awm a, chungte chu (1) Zawngling  (2) Rawmibawk (3) Saihatlangkawn (4) Lungpuk te an ni. Polling Station pangngai ah MRP 2 theuh dah an ni ang a, Sensitive Polling station-ah hian Armed Police Section chanve leh MRP in-charge officer 1 zel dah an ni bawk ang. Heng bakah hian VDP leh NGO te chu polling party te a tul ang a lo puibawm tur a beisei an ni.

GAD chuan MADC area chhunga elector ten vote an thlak ngei theih nan hian May ni 3, 2012 hi public holiday-ah a puang a, State Election Commission chuan MADC area chhunga electors zawng zawngte chu an aiawha roreltu tur thlannaah hian an vote hlu tak hmanga tel vekturina sawm a ni.