Zirtir 12 zinga India ram rawn tlawhtu awmchhun Thoma kohhran dinte zinga peng pakhat Laka St. Thom Marthoma Church chuan an kum 125-na chu Kerala state khaw pakhat Edayaranmula-ah April ni 28 khan an lawm a. He hunah hian Khuallian tura an rawn sawm Mizoram Art & Culture Minister leh National YMCA Vice-President ni bawk Pu P.C.Zoramsangliana chuan a zuk hmanpui a ni.

Inkhawm urhsun leh an hlut em em, mithianghlim Thoma’n a din kohhran peng hrang hrang hruaitu lu fuankhawmnaah hian Pu P.C.Zoramsangliana chuan Mizoram kohhran leh mipui zawng zawng aiawhin chibai bukna a hlan a. Mar Thoma Kohhran thupui ‘Lighted to Lighten’ (Eng tir tura tih en) tih chu pianphung rengah zirtirte hnungzui, khawvel pum huap, rinna nghet nei, chanchintha puandarh kawnga hmalatu an nihzia a lantir a ni, a ti. He Kohhranin mipui tana a rawngbawl langsar tak nia a hriatte chu hmeithaite tana an intuamhlawmna tur ruahman sak leh zirna kawnga an hmalakna te a ni tiin kohhran dangte pawh hian entawn se, Mizoram ngeiah pawh hma kan lak uarna tur nia a hriat thu a sawi a. Minister chuan he hun hlu tak a hmanpuina hian Mizoram leh ramchhung Kristian zawng zawngte inkar pawt hnaitu ni thei se a duh thu te, rinna nunga ding Kristiante hian rinhlelhna nei lova khawiah pawh Van lal fate kan nihna hre reng turin a chah a ni.

Mar Thoma kum 125-na lawmna inkhawmah hian an Kohhran hotu lu ber Most Rev Dr. Joseph leh Most Rev. Dr. Geevarghese te bakah Kerala sorkar MLA te leh mi pawimawh dang engemawzat an tel a. Khawmpui a chhim hriatreng nan hian Pu Zoramsangliana hi an state-in an hlut leh an ngaihsan em em ‘Aranmula Kannadi’ (Metal Mirror) an hlan a ni.