District Agriculture Officer’s Office, Serchhip hmalaknain nimin khan Agriculture Rest House, Zawlpui ah Mat ruama leilet neitu te puala lo zawh programme hlimawm tak hman a ni a, he hun hi Agriculture Minister Pu H.Liansailova chu khuallian niin a hmanpui a ni.

Lo zawh puala inkhawm buatsaihah thusawiin Agriculture Minister chuan Mat ruama loneitute thawhrimna rah hlu tak leh chhuanawm tak mai hmu thei a a awm chu vannein a in tih thu sawiin loneitu te leh DAO Serchhip leh a thawhpuite thawhrimna leh taimakna a fak a ni.

Minister chuan loneitu kalkhawmte chu fuihin buh leh bala Mizoram intodelh tir theitute chu loneitute an nih thu a sawi a, vai buh lei nana sawrkarin thlatin vaibelchhe 10 chuang a seng ziah hi a uihawm em em a, loneituten mithiamte kaihhruaina hnuaia uluk taka hma an lak zel chuan heng sum zawng zawng hi Mizoram pawna luan chhuah tir loh a ni dawn a, sawrkar sum tam tak vai rama a lut thla tur ti tawp turin loneituten tan lak a ngai a ni tiin, mahni tharchhuah ngei zoram chhunga hralh hi a hlut mai bakah Mizoram economy hmasawnna atan a pawimawh em em a ni a ti bawk.

Minister chuan leilet neitute chu SRI buh ching uar lehzual tura fuihin Sawrkar hmalakna thlawp tur leh Agriculture Department mithiamte thiamna leh finna chhawr tangkai thiam turin a chah a, hnathawk tak tak leh tih tak tak na nena beitu te kut chu Pathianin mal a sawm ngei ngei thin a ni a ti bawk.

Pu Liansailova chuan Sawrkarin Zawlpui phai a ngaihpawimawh thu sawiin tih hmasawn lehzual nan ruahmanna chi hrang hrang siam anih mek thu a sawi a, leilet nei tut e chu tun aia an hlawk lehzual theih nan buh an chin zawh hnu ah zikhlum, parbawr, purun, motor chana adt. ching turin a hrilh a, an chin tam duh a an tih that duh phawt chuan a chi tur an mamawh zat sawrkarin ngaihtuah sak a inhuam thu a sawi bawk a ni.

Minister chuan leilet neitute chu Oil Palm chin kawnga tan nasa leh zual tura fuih bawkin Zawlpui ah ngei Oil Palm factory din tuma hma lak mek anih thu leh a hlawhtlinna hmuh thuai beisei a nih thu a sawi bawk a, loneitu dik tak ni ve lem lo loneitute hamthatna dawn tur dik lo taka beisei a lo chuhpui ve thin an awm tih thu sawiin Minister chuan loneitu dik tak te tan Farmer’s Identity Card a siam mek thu leh kumin chhung ngei a sem chhuah hman tum anih thu a sawi a, hei hian loneitu dik tak ten an chanpual an hmuhna kawngah dik taka hma a lak tir theih a beisei thu a sawi bawk a ni.

Minister hian Zawlpui phai a thlen veleh hian leilet hmun a buh chin te a hmuna panin a en nghal a, lo zawhna leilet hmunah hian hman nghal ni in loneitute hian darkhuang leh lamin minister hi an lo lawm a ni.

Mat ruam Zawlpui phaiah hian chhungkaw 134 in ram hectare 115.9 huamchhungah SRI buh an ching a, chhungkaw 31 in Improved method in ram hectare 17.7 huamchhungah an ching ve bawk a, an vaiin chhungkaw 165 in ram hectare 133.6 a zau ah SRI buh hi an ching a ni.

Serchhip District pumpui anga chhut chuan chhungkaw 589 in SRI buhfai hi ram hectare 400 a zau ah an ching a, chhungkaw 352 in Improved Method in ram hectare 336 a zau ah an ching bawk a, a vaia lak khawmin Serchhip District chhungah chhungkaw 941 in ram hectare 736 a zau ah SRI buhfai hi an ching a ni. Mat ruama leilet neitute zinga 70% in SRI buh an ching a ni.

DAO, Serchhip leh a thawhpuite tanlakna a zarah Serchhip District chhunga buhfai tharchhuahin hma a sawn nasa hle a, kumin chhung hian SRI buh ching tura campaign in hmun 26 ah an feh chhuak a, DAO staff te hi team 15 ah in thenin Serchhip District chhung a nfang chip chiar hle a ni, hei bakah hian kumin June thla khan Farmer Field School Training tum thum buatsaih a ni bawk. Kumin (2011) hian Serchhip District atangin buhfai (SRI+IP+Normal) quintal 43660 vel thar chhuah in beisei niin kum kalta (2010) khan quintal 27930 thar chhuah a ni. Serchhip District ah Oil Palm hi kum 2008 atanga chin tan niin kumin chhung (2011-12) hian ram hectare 249.747 a zau ah kung 37462 phun a ni a, tun dinhmunah hian a vaiin ram hectare 921.12 a zau ah Oil Palm kung 138152 phun a ni tawh a ni.

Lo zawh inkhawm hi Dr. C.Lalzarliana, Director (CH), Agriculture Department in a kaihruai a, Pu Lalthansiama, DAO Serchhip-in report pe in tlaiah lo zawh ruai an kil ho nghal bawk a ni.