Chief Minister Pu Lal Thanhawla chuan Matric exam-ah Mizo mipa ten tan an lak hle a ngai a ni, a ti. He thu hi vawiina Mizo Zirlai Pawl (MZP) General Hqrs., Aizawl in Vanapa Hall-a HSLC 2011 Top Ten Mizo tlingte chawimawina programme an buatsaih a a sawi a ni.

Chief Minister chuan hetiang zirlai ti thate hnena chawimawina programme MZP in a siam chu lawmawm a tih thu sawiin, mi thahnemngai te leh mi thil phal ten phal taka thawhlawm an thawh atangin chawimawina thil pek buatsaih a ni chu a thianghlimin a zahawm a ni a ti a. Thawhlawm thawhtu te, school hrang hrang hotute leh nu leh pate hnenah lawmthu a sawi a. Exam a ti tha lo deuh ten chona ah ngai turin a fuih bawk a ni.

Chief Minister chuan MZP in zirlaite hamthatna leh an hmasawnna tura hma an lak chhung chuan sorkar ang pawhin kan thlawp dawn a ni a ti a. Politician anga an chettlat erawh chuan inbah chang kan nei ang a ti. Hnam rilru kan neih hi ringtu kan nihna nen kan kalpui chuan in chimralna hi a hauhawm lo a ni a ti a. Chuvangin taimakna nen thawk a, thawh hreh leh thawh peih loh nei lovin midangte thawh peih leh thawh theih chu thawh inhuam turin thalaite chu a chah a. Hetiang hi kan tih peih chuan Mizoram leilung fa ni lo hnathawh tur nei rengte hian Mizorama awm reng an peih lovang a ti. Chuvangin kan thanharh a hun hle a ni, a ti.

Pu Hawla chuan eirukna chungchang sawiin kuttling lova sum hmuh tum Mizote zingah a pung hle nia a hriat thu a sawi a. Sum hi zawn hmuh chi a ni lova, a thawh a thawh chhuah chi a ni a ti. Sorkar hnathawkte chu an hnathawh theuhah tui taka thawk tura a duh thu sawi bawkin sorkar hna kan thawh duh chhung chu sorkar thu kan zawm tur a ni a ti a. Mahni thawh duhna hmun ringawtah thawh tum tur a ni lo a ti.

Chief Minister chuan thalaite tan khawvel thar sorkar in a buatsaih mek zel thu sawiin zirna in tha IIMC te, NIT te leh Medical College te thlengin Mizoram ah bultan tep anih thu a sawi bawk a. Heng zirna in hian hnamdangte nen in pawl hona tha, exposure a siam thei dawn a ni a ti a. Zirna in pawimawh tak takte chu Mizoram ah dah vek a duh thu a sawi bawk a ni.

Vawiina zirlai ti thate chawimawina thil pekte hi Chief Minister hian a hlan a. HSLC 2011 top ten a Mizo lang pha 9 te hnena chawimawina thil pek thawhtute hi mi hrang hrang an ni a. Pawisa fai Rs. 10000/-, Rs. 7000/-, Rs. 5000/- leh Rs. 2000/- ten an thawh a ni. Heng pawisa fai bakah hian mi hrang hrang te hnen atang bawkin certificate, pendrive, lehkhabu leh thil dangte hlan an ni bawk a ni.

MZP hi 1935 October 27 a din tan a ni a. Matric exam a Mizo ti tha zual Top Ten a lang phak te hnenah 1995 atang khan zirna ah inelna thianghlim a awm theih nan hetiang chawimawina programme hi buatsaih thin a ni.

Chawimawina inkhawm hi MZP Gen. Hqrs. Vice President S. Lalrinawman a kaihruai a ni.