Love India Missions, Mizoram chuan vawiin khan rampum aiawhin lawmthu sawina leh sual thupha chawia chawnghei-tawngtaina Aizawl Lammual-ah an buatsaih a, he hunah hian Mizoram Larsap Lt.Gen.(Rtd) M.M.Lakhera leh sorkar mi pawimawh hrang hrang te pawh an tel a ni.

Mizoram state lu ber a nih anga he huna tel tura sawm a nih angin Larsap Pu Lakhera chuan thu sawina hun a hmang a, he Ni hi Mizoram chanchinah chuan ni danglam bik leh chhinchhiah tlak a ni, a ti. Khawvel hmun hrang hrang thlirin chhiatrupna rapthlak tak tak te, ruah, thlipui leh khawkheng namen lovin boruak sik leh sa a tibuai a; heng hi a chhan kan chhut chuan mihring ten kan awmna leilung hi kan ti chereu leh suasam nasat vanga thleng a ni a. Kan nunphung kan tihdanglam loh chuan heng aia nasa chhiatna pawh tuar thei dinhmunah mihring te hi kan ding reng tawh a ni, a ti. Pathianin inhmangaih a, inngeih dial diala awm tura min duh laiin khawvel ram leh chi hrang hrang karah innghirnghona leh tharum thawhna te a tam tual tual hi a pawi a ni tiin Larsap chuan vawiin tawngtai hona-ah hian kan sual thupha chawi mai bakah tun atanga kawng dik zawk kan zawh theuh turin dil a pawimawh a ni, a ti. Pathian malsawmna leh chakna kan dil zel ang a, kan mihringpuite leh ram tana rawngbawltu tha kan nih theuh theihna turin tan i la sauh sauh ang u tiin kalkhawmte a chah a ni.

Vawiina Lammual-a tawngtai inkhawmah hian Minister-te Pu R.Lalzirliana, Pu J.H.Rothuama, Pu H.Liansailova, Pu H.Rohluna leh Pu Lalrinliana Sailo te bakah  Pu Joseph Lalhimpuia MLA leh MLA Dr.R.Lalthangliana te pawh an tel a ni. He hunah hian a bik takin Governor leh ram hruaitute tan kalkhawmte chuan tawngtaina hun an hmang bawk a ni.