Vawiin chawhma dar 11 khan Horticulture Conference Hall-ah Mizoram Florists Association General Assembly vawi 8-na neih a ni. Pi Lal Riliani, Chairman Indian Society on Tobacco & Health Mizoram Chapter chuan khuallian niin a hmanpui.

Khuallian Pi Lal Riliani chuan thu sawiin Florists Association in hma a sawn zel chu lawmawm a tih thu a sawi a. Mihring nun tihlimtu pawimawh tak pangpar hi sum hnar tha tak a lo ni ta bawk nen uar sauh sauh ang u a ti a. Pangpar mawi taka par tura sawngbawl dan hautak zia hre lo kan la awm nual niin a langa, nu tam tak ten ei rawngbawlna choka leh fanau te kalsan lovin sum tam tak an la lut thei te hi fakawm a tih thu a sawi. Pangpar mawi taka kan khawi puitlin rual hian nu hote hian kan tu leh fate tha taka tih puitlin hi kan mawh a ni tih hre tel ila, tu leh fate tan enkawltu tling ni turin kan inbuatsaih tur a ni a ti.

Inkhawm hi Pi Lalropari President in a kaihruai a, MFA ah hian Branch 11 awm tawhin, member an kal thahnem hle. Horticulture Department kaihhruaina in pangpar enkawl dan an zir hova a. Chawhnu lamah hruaitu thar an thlang nghal a ni.