Mau hmanga eizawnna leh sumdawnna ti hmasawn tura NLUP hnuaia hmalakna leh National Bamboo Development Mission hnuaia Forest department hmalakna te thlir ho va, awmze nei zawka heng hmalakna te kalpui dan tur ngaihtuahin vawiin khan Chief Secretary Pi L.Tochhong hovin Pu Sanjay Kumar, Dy.Director General, National Bamboo Mission leh NLUP Implementing Board hotute, Environment & Forest department hotute leh Bamboo Development Agency hotu ten Chief Secretary’s Conference Hall-ah meeting an nei.
Mizoram in forest hausakna a ngah ber, rua leh mau te chu ram sum hnar pawimawh ber pakhata siam tura NLUP hnuaia hmalak mek te leh hemi atana sum mamawh te chu he meeting ah hian thlir ho a ni a. Hemi rual hian hmalakna tichak turin NIB chuan ruahmanna thar chipchiar zawk a duang tawh a. Hemi hnuaiah hian Forest leh NLUP tangkawp chuan mau chinna hmun tur bik khua te thlang chhuak a, heng hmun te hi common facility centre atan hmang a mau sawngbawlna (processing) hmun nena thlun zawm turin vawiin meetinga sawi hona atangin ruahmanna siam a ni dawn a ni.
Hemi lo bawhzui tur hian Chief Secretary chuan NIB leh National Bamboo Mission, Mizoram te chu a rang lama DPR buatsaih turin a ti a. Mizoram hmalakna rawn ngaihven a, a tul anga hma rawn lakpui tura lo zin Pu Sanjay Kumar chu lawmthu hrilhin Mizoram tan theihtawp lo chhuah zui turin a ngen nghal a ni.
