Mizoram University a School of Engineering & Technology Complex (SET), Rs. 23,43,43,898/- seng a sak chu vawiin khan Education Minister Pu Lalsawta’n a hawng.

He SET hawnna inkhawm Prof. R. Lalthantluanga, Vice- Chancellor kaihhruaiah hian Education Minister chuan Mizo thalai te state pawn leh ram pawna zirna sang zawk bei turin tam tak an chhuak a, state sum ramdangah a luangral nasa hle a ni a ti a. Tun ang zela MZU hi a than chuan kum reiloteah state dang atang leh ram dang atang zirlai an lo lut dawn ani a ti a. MZU hnathawkte chu an thiamna te midang finchhuah nana hmang tam turin a chah a. Education Minister chuan tunlai khawvelah chuan lehkhathiamna leh zirsanna ngawr ngawrin hna hmuh a tiam lova, thiam bik thil neih a ngaih thu sawiin, hemi kawngah hian thalaite’n hna an hmuh zung zung theih nan ‘Skill Development’ kalpui mek anih thu sawiin, hmalakna tur tam tak ala awm a ni, a ti. Tunlai khawvel mil zela kan zirna te kan her rem a tul thu sawiin, kan ram leh hnam tih hmasawnna kawngah mawh kan phur theuh a ni tih hriain kan theihna zawn theuhah hma kan la tur a ni a ti bawk. Minister chuan Mizoramin a mamawh Engineering school hawn theih ani chu a lawm thu a sawi bawk.

SET hi November, 2009-a sak tan niin, February 2013-ah zawh a ni a. Department pali- Information Technology, Electronic Engineering, Computer Engineering leh Electrical Engineering awmin, Architecture Department siam tura hmalak mek a ni. Hostel building pahnih mi 100 ve ve awm theihna tur a awm bawk a ni.

He SET hawn anih rual hian Solar Photo Voltaic Power Plant 799KWp siamchhuak thei chu hawn nghal a ni a, Home Minister Pu R. Lalzirliana’n a hawng a ni.