700KW pe chhuak thei Rs.19,81,18,991/- senga siam Solar Photo Voltaic Power Plant (SPV), Mizoram University ami chu vawiin khan Home Minister Pu R.Lalzirliana’n a hawng.

He Plant hawnna inkhawm Prof. R. Lalthantluanga, Vice- Chancellor kaihhruaiah hian Home Minister chuan Environment ti chhe lo, ni zung chakna hmanga Electric Power siamchhuak thei SPV siam anih leh hawn theih a a awm chu lawmawm a tih thu a sawi a. India ram University-a Solar Plant nei hmasa pawl an ni thei chu Vice-Chancellor leh a thawhpuite hmalakna a ni tiin, chhuanawm a tih thu a sawi. Tun dinhmunah MZU Power mamawh zawng zawng phuhru thei lo mahse a tam zawk a phuhruk theih dawn avangin MZU chuan Power lamah harsatna an pumpelh thei dawn a ni a ti a. MZU chu mithiam rual awmkhawmna leh chherchhuahna hmun a ni tiin, an thiamna leh campus chhung boruak Mizorama phochhuak a, mipui te finchhuah thin turin a fuih a, chhenfakawm leh chhawrnahawm tak ni turin a chah bawk.

He SPV Sorkar laipuia Ministry of New and Renewable Energy-in chak zawk leh hlawk zawk a hmalak anih theih nana a siam Jawaharlal Nehru National Solar Mission (JNNSM) January, 2010 atanga a kalpui hnuaiah hmalak a ni a. MNRE chuan SPV siamna tur sum hi 16 December, 2011-ah khan MZU leh MNRE channel partner pakhat M/s Agni Power & Electronics Pvt. Ltd. Kolkata India hnenah a sanctioned a, M/s Agni Power & Electronics Pvt. Ltd. Kolkata India hian a siam hna hi a thawk nghal a, September 2012 khan zawhfel a ni. He SPV ah hian 2380 Solar PV Module leh 1680 battery hman a ni. SPV hi MZU campus chhungah hian hmun sarih ah hun a ni a, Plant pakhat hian 100kwp zel a siamchhuak thei a ni.

He SPV hawn anih rual hian School of Engineering & Technology Complex chu hawn nghal a ni a, Education Minister Pu Lalsawta’n a hawng a ni.