Union DoNER Minister Pu Paban Singh Ghatowar chuan vawiin chawhma dar 10:00 khan Saiha-ah khum 100 awm theihna tur Civil Hospital Rs. 15.92 crore seng a sak tur lungphum a phum.
He lungphumna programme hi Pu S. Hiato, Ministe, PHE in a kaihruai a, khuallian Pu Paban Singh Ghatowar, Union Doner Minister chuan thu sawiin Saiha-ah damdawi In changtlung tak sak a nih theihna tura lungphum a ni ta chu lawmawm a tih thu a sawi a. Saiha district tan ni chhinchhiahtlak leh hun lawmawm tak a nih thu leh a sak hna pawh tan nghal theih tura sanction anih tawh thu a sawi nghal bawk a ni. Union Minister chuan UPA sorkar chuan India ram hmun tinrengte hmasawnna khairual taka a kal theih nan hna nasa takin a thawk a ni a ti a. Central sorkar scheme pawimawh tak Miretheite khaichhuahna tur MGNREGA chuan India ram hmun kilkhawr ber ber te pawh a tuam chhuak a ni tiin India sorkar chuan Ziak leh Chhiar thiam lohna hi umbo tumin hma nasa takin a la mek a, Mizoram chu lehkhathiam state in ni tiin mirethei te tana programme tha em em Food Security Bill pawh passed tawh niin hman thuai theih a beisei thu a sawi bawk. He Food Security Bill hi hman anih hun chuan India khua leh tui tupawhin buhfai kg.1 Rs. 3 in kan lei thei tawh dawn a ni a ti a. Mizoram chuan inthlanpui a hmachhawn mek thu sawiin inthlan hi ram mipuite tan hmasawnna pawimawh tak a ni a ti bawk. UPA sorkar chuan project hrang hrang 127 duang chhuakin heng zinga project 57 chu zawhfel a nih tawh thu a sawi bawk a ni. Kaladan Multi Model Project hna pawh zawhfel a nih hun chuan Saiha district chu India ram kawtchhuah pawimawh tak a nih dawn thu sawiin he project hi a chhawr tangkai ber tur chu Saiha leh Lawngtlai District chhung mipuite an ni, a ti bawk.
He programme-ah hian Pu H. Liansailova, Minister, Planning & Programme Implementation pawhin thu sawiin, hetianga Saiha district tan hmasawnna ropui tak Civil Hospital changtlung tak sak theihna tur lungphum a ni ta chu lawmawm a tih thu a sawi a, Mizoramin eng lam a kan intodelh lohna pawh hun reiloteah chuan Tuirial Hydel Project hmanga sutkian thuai a nih a beisei thu a sawi a. Tuivai Hydel Project khuahna tur pawh Central sorkar in min pawmsak tawh a ni, a ti bawk. Mizoram sorkar Flagship programme NLUP chungchang sawiin he NLUP Special Scheme ah hian cheng vaibelchhe 2850 hmuh a ni a, cheng vaibelchhe 1300 hman ral tawh a ni a ti bawk. NLUP dawngtute chu hlawhtlinpui tum theuh turin a chah a, a hlawhtlinna ah hian sorkar lam mawh nilovin a dawngtute mawh a ni, a ti bawk. Saiha district tan Saiha College sakna tur cheng vaibelchhe 3 chuang dah anih thu leh Lorrain Market sak nan cheng vaibelchhe 3 dah a nih bakah Tuipang Water Supply Scheme atan cheng vaibelchhe 9 dah a nih thu a sawi bawk.
He lungphumna programme ah hian Health Minister Pu Lalrinliana Sailo chuan thu sawiin Saiha bialtu Minister Pu S. Hiato hmalakna leh thahnemngaihna zarah Civil Hospital changtling tak cheng vaibelchhe 15.92 senga sak theihna tur lungphum phum a ni thei ta chu lawmawm a tih thu a sawi a. Mizoram-ah Doctor te indaihlohna nasa tak phuhruk turin Doctor pawh 57 lak thar an nih tur thu a sawi bawk. Naupiang hlim thihna a tlakhniam theih nan cheng vaibelchhe 31.32 central sorkar atanga dawn a nih thu sawiin sorkar chuan Doctor nghet 90 la tawhin Doctor nghet lo 35 lak an nih tawh thu a sawi bawk.
He lungphumna programme ah hian MADC Cultural Troupe ten hnamlam an entir a, Pu R.T. Zachono, CEM, MADC chuan District chhung harsatna hrang hrangte Minister hnenah thlen pahin lawmthu sawina a neih hnu ah he programme hi tihtawp a ni.
