Tukin zing khan Art & Culture Minister Pu P.C. Zoram Sangliana chuan Bethlehem Veng YMA Library a hawng.

Pu P.C. Zoram Sangliana chuan library changtlung tak din tura Bethlehem Veng mipui leh khawtlang hruaitute tanlakna a fak a. Mizoram sorkar sum ni hauhlo, a ngaihna hria ten sorkar laipui atanga an haichhuah sum hmanga library 79 zet Mizoramah din a ni tawh tih sawiin Raja Ram Mohan Roy Library Foundation (RRLF) atanga Art & Culture Department-in library sakna tur sum a pek piahlamah khawtlang mipuiten tha leh sum tam tak sen belha library tha an din chu lawmawm a ti a, uluk leh tangkai taka hmang zui turin a chah. Art & Culture Minister chuan a ngaihpawimawh em em hlamzuih tihtawp chungchang sawi nawn lehin Mizorama kohhran lian ber, Presbyterian kohhranin hlamzuih titawp tura hma a la chu lawmawm a tih thu leh Kristian nundantha chawisangtu YMA pawhin hlamzuih tihtawp zai rel ve tawh se a duh thu a sawi lang a. Ram hmasawn zelah Mizo mipuite chu sorkar emaw mimal thilah emaw mawhphurhna pawimawh tak tak chelhtu vek an nih angin mitthi sawngbawl dan pawh ennawn tula a hriat thu Minister chuan a sawi a, tlai lama mitthi vuite leh kohhran emaw YMA Hall-a mitthi vui mai chu thil finthlak leh tunlai Mizote khawsak dan nen inmil nia a hriat thu Pu P.C. Zoram Sangliana chuan a sawi a ni.

Art & Culture Minister hian Mizo culture chawinung zel tura incheina a pawimawh thu pawh sawi nawnin Mizo hmeichhiate’n puanbih an uar zel chu lawmawm a ti a. Hetihlai hian mipa lam pawhin tan lak tula a hriat thu leh engemaw pawimawh nikhuaa Mizopa kutchhuak khumbeu khumte uar thar tura ngenin mahni hnam incheina ngaihsan hi culture vawnhimna pawimawh tak a ni, a ti.

Library hi RRLF kaltlangin Art & Culture sum cheng nuai 6 bakah veng mipui thahnemngaite thawhkhawm cheng nuai 2 bawr vela senga sak zawh a ni a. RCC building niin a dung 40ft, a vang 27ft a ni a. Hawnna inkhawm hi Bethlehem Veng YMA President Pu J. Lalthutiama’n a kaihruai a, Art & Culture Director Pu Ngurbiaka leh Mizoram Library Association President Pu Lalramliana te pawhin thu an sawi a ni.