Mizorama nihnih chamtura lo zin DoNER Minister Pu Paban Singh Ghatowar chuan vawiin khan cheng vbc. 5.5 senna tur Mara Students Hostel, Zotlang, Aizawl-a sakna tur lungphum a phum.

Thu sawiin Pu Paban Singh Ghatowar chuan Mara Students Hostel hun reitak ata lo er tawh  sak a ni thei dawn ta chu lawmawm a tih thu sawiin, Mara zirlai ten tangkai taka an chhawr ngei a beisei thu a sawi a. Hemi sakna tur atana Mizoram sawrkarin DoNER Ministry a DPR a thehluh chu pawm a nih thu leh a sakna atan hian vbc. 5.5 phalsak a nih thu a sawi bawk. DoNER Minister chuan hmasawnna rah mitinin an chan theih nan sawrkar laipui chuan huapzo hmasawnna (inclusive development) a kalpui mek a ni tiin, North East chu a bik taka ngaihsak a nih thu a sawi a, hemi atana din NEC pawhin theih tawpin hma a la zel a ni, a ti a. Sawrkar laipuiin Myanmar nena inkungkaihna thazawk siam a tum mek zel a, hei hian Mizoram chu kawtchhuah pawimawh takah a siam dawn a ni, a ti a. Mizoram chu ziak leh chhiar thiam tamna state a nih bakah remna leh muanna dinchanna state a nihna chu chhuanawm a tih thu a sawi bawk. Minister chuan Mizoram tan DoNER Ministry-in sum a sanctioned tawh zat chu vbc 1,044 a nih thu a sawi bawk.

DoNER Minister hian naktuka a tlawh tur Saiha Hospital thuam that nan vbc 16.17 sanctioned a nih thu a sawi bawk.

He lungphum phumna inkhawmah hian  MADC Chairman Pu Hipheia'n  inlawmna thu tawi sawiin, MADC chanchin tlangpui a tarlang bawk.

Minister hi Mizoram sawrkar atangin Finance Minister Pu H.Liansailova, Parliamentary Secretaries Pu KS Thanga leh Col. ZS Zuala te bakah MLA thenkhatin an tawiawm a. DoNER official thenkhatin an lo zui bawk.