Vawiin khan Mizorama ni hnih cham tura lokal, Pu Paban Singh Ghatowar, Union Minister of State for Development of North Eastern Region (DoNER) chuan Aibawk Water Supply Scheme lungphum a phum.

Pu Paban Singh Ghatowar chuan  Sorkarin Aibawk mipuite tui harsatna hriaa, midang nghaktu tam tak zinga he Scheme dawng tura thlanchhuah an ni chu a lawmpui thu a sawi a, PHE Department vilna hnuaiah a hun taka an zawh hman a beisei thu a sawi bawk. Sorkar laipui chuan Mizoram mipuite mamawh leh hmasawnna turte a ngaih pawimawh thu sawiin, DoNER Ministry pawh hemi kawngah hma chak taka la tura chah an nih thu a sawi a; Mizoram chuan remna leh muanna hnuaiah hmasawnna kawng a zawh mek zel a, sorkar chak tak hmalaknain scheme hrang hrangte tangkai tak leh hlawhtling taka kalpui a ni thin chu fakawm a tih thu a sawi bawk.

DoNER Ministry chuan Mizoram tan hmasawnna hna a thawh tawhte leh hmalakna kal mekte tarlangin, power lamah pawh project lian tak takah ruahhmanna a kalchhoh mek thu a sawi a, Tuirial Hydro Electric Project sakna atan DoNER chuan cheng vaibelchhe 100 a pek thu leh, vaibelchhe 200 dang pek leh tur anih thu sawiin, hei hian power-ah hnianghnarna a thlen dawn bakah, hralhchhuak thei turin Mizoram a siam dawn a ni, a ti bawk.

Mizoram mipuite chu remna leh muanna ngaina hnam, mi taima leh Pathian tih mi an nih thu sawiin, State Sorkar chak tak hnuaiah Mizoram chu India rama State hmasawn chak leh ralmuang ber a ni chho mek zel a ni, a ti.

Inkhawm hi Pu H. Liansailova, Planning & Programme Implementation  Minister chuan kaihruaiin,  Sorkarin an harsatna hria a, an mamawhte tihhlawhtlin a lo ni tur chu Aibawk mipuite a lawmpui thu a sawi a; thusawitu dang Pu K.S. Thanga, Bialtu MLA leh Parliamentary Secy. ni bawk chuan, Sorkar in Aibawk khaw tana a thawhsak hi an hriatreng tur thu sawiin, a hlawhtlinna atana thawktu zawng zawng chungah lawmthu a sawi a, sorkar leh khawtlang mipuite thawhrimna avanga hlawhtling a nih thu a sawi bawk. Er. R.Lalfanliana, Engineer-in- Chief, PHE Department chuan Technical Report pein, khawtlang aiawhin, Pu H. Lalthakima, VCP, Aibawk chuan lawmthu a sawi bawk.

Aibawk Water Supply Scheme hi khaw pathum- Aibawk, Sateek leh Phulpui te chawm tura ruahhman a ni a, nikhatah mi pakhatin tui litre 70 zel dawngturin, mi 8,255 a chawm thei dawn a ni. A tui hi Tuirivang lui ami lak tur niin, reservoir 4siama ni dawn a, 11KV Line pawhthlak a ni anga, pipe hi 33km vela sei a ni ang. Kum hnih chhunga sak zawh hman tura tih niin, cheng vaibelchhe 9.98 senga sak tura ruahhman a ni.

He hunah hian Pu R.L.Pianmawia, Deputy Chief Whip leh Col. Z.S. Zuala, Parliamentary Secy. te an tel a, DoNER Minister hi Pu V.B.Pathak, Joint Secretary, DoNER, Pu Umakant, Director, DoNER leh Pu Heera Acharya, Addl. PS. to Union Minister ten an tawiawm bawk a ni.

DoNER Minister hianLengpu iAirport atanga Aizawl a rawn panna kawngah, nimin piaha Tlawng luia tla, Johnny C. Lalremruata  ruang zawnga hnatlangte tanpuina pawisa fai a hlan bawk a ni.