School Education changtu Parliamentary Secretary Pu Joseph Lalhimpuia chuan Govt.Maubawk High School Silver Jubilee lawmna hmanpuiin school building sak thar a hawng nghal.

Pu Joseph Lalhimpuia chuan Maubawk High School in kum 25 a lo tling ta leh RMSA sum hmanga building thar tha tak an sa thei chu a lawmpui a. Zirlai naupang te fuihna thu sawiin midangte tluk pui leh a aia sang pawh an thleng thei tih hriaa tang sauh sauh turin a chah a. Sorkarin quality education nei turin theihtawp a chhuah mek tiin hemi tihhlawhtling tur hian zirtirtute leh nu leh pate chu zirna kawnga nasa lehzuala tan la turin a chah a ni.

Parliamentary Secretary chuan High School Headmaster post ruak 49 hnawhkhahna tur order chhuah a nih tep tawh thu leh mid day meal enkawltute hlawh pawh naktip maia pek a nih tur thu he hunah hian a tarlang a.  RMSA hnuaiah Govt High School ten kum tin annual grant cheng 5000 leh minor repair grant cheng 25000 an dawn thin pawh sawi langin pek an nih chhan ang takin a hmanna tur dik takah tangkai taka hmang turin a chah bawk.

Silver Jubilee monument leh Building thar hawnna hi school compound a neih a nih hnuah Maubawk Presbyterian Kohhran Hall-ah a lawmna inkhawm hman zui a ni. Building thar hi RMSA hnuaia Strengthening of School Building atanga sum hmuh cheng nuai 32.25 senga sak a ni. Pu Joseph Lalhimpuia hian Maubawk High School Jubilee Souvenir a tlangzarh nghal bawk.