Cheif Minister Pu Lal Thanhawla chuan sorkar hmalakna te hi lo er tawk leh ti sukuk duhtu an awm thin avangin khawtlang leh pawl anga hmalakna hi a hlawhtling duh fo zawk a ti. He thu hi vawiina Mizoram Football Association General Body Meeting, Berawtlanga neiha a sawi a ni.

Chief Minister chuan Mizote hi kawng tam takah sorkarah ringawt kan innghat thin a, hun lokal zelah pawl ang leh mimal ang ten hma kan la chho ve tan a, hlawtlinna leh hmasawnna pawh kan hmu chho ve ta a a lawmawm hle a ni a ti a. Kan thalaite hian talent cho chhuah tham an nei a, a cho chhuah dan lamah kan thiam hle a tul a ni a ti a. Infiamna lama footballah ringawt pawh nasa takin hmasawnna hmuh tur a awm a, hei hi association te thawhrimna leh tanrual vang a ni a, an chungah leh mimal thahnemngaite chungah lawmthu a sawi a ni.

Chief Minister chuan heng hmasawnna kan hmuhte hi kan chapo pui mai ang tih a hlauhawm a, Pathian malsawmna leh kaihhruaina vang chauh nei kan ni tih kan hriat a tha a ti a. Mizoramah industry leh corporationte a awm loh avangin sorkar chauh hi hna pe thei a ni rih a. Amaherawhchu hna pek sen vek an nih loh avangin kan thalaite hi pawnlamah a tam thei ang ber thawnchhuah theih dan sorkarin a ngaihtuah a. Hemi atan hian skill development leh capacity buildingte a kalpui chho mek a ni a ti a. Infiamna, abikin football leh cricket te hi eizawnna mai nilo hausak theihna a ni tiin, infiamnna dangte pawh eizawnna tlak, coach leh referee puitling nihte hi eizawnna tling an ni a, helamah hian kal dan ngaihtuah a tha hle a ni a ti. Tun hnaiah India a football inkhelhna sang ber I-League kan thleng hi mithahnemngai leh association tan lakna rah a ni tiin, Aizawlah I-League khelh anih theihna turin All India Football Federation hotute nen an sawiho thu te a sawi a. Kan thil tihna apiangah Pathian malsawm tlaka kan awm a ngai tiin, association hruaitute chu sports administrator an ni a, entawn tlaka an awm angai a ni a ti. Chief Minister chuan infiamna hmunhma infrastructure district tina siam tum anih thu sawi bawkin hei hian mitin tan infiamna an ban phakah a awm dawn a ni a ti.

MFA President Pu Lal Thanzara, Minister of State chuan footballah tunhmaa kan la tawn ngai loh kan tawng chho mek a ni tiin, Santosh Trophy ah te Champion nihna te kan la a, hei hi Pathian tanpuina vang a ni a ti a. I-League kan thleng hi Mizoram, abikin MFA tan chuan bung thar a ni a ti. Sorkar hotute chungah leh MFA chungah lawmthu a sawi a ni.

MFA sum dinhmun report ah sum hmuh zawng zawng hi Rs.49,05,433/- a ni a, hmanral zawng zawng Rs.47,20,656/- a ni a, tunah hian kuta la awm chu Rs.2,46,323/- a ni.

Meeting hi Pu P.C.Vanlalhruaia, Sr. Vice President in a kaihruai a. Session hnihah rorel niin District leh MFA te agenda te sawiho a ni a, MFA Calendar 2015-16 awiho bawk a ni. Session thumna ah hruaitu thar thlanna neih a ni.