2667/2022-2023
Aizawl the 15th November 2022 : Hnahthial District chhung Maudarha ABCI Quarry chim chungchangah Mizoram Sawrkar Disaster Management & Rehabilitation Department chuan vawiin khan Mizoram Sawrkarah thil thlen dan chungchang report a thehlut.
He chhiatna rapthlak hi November ni 14, 2022 chawhnu dar 2:40 khan a thleng a. Lung lakna quarry, ABCI Infrastructure Pvt. Ltd. ta a ni. Report thehluh a nih thleng hian duty roaster atanga a lan danin quarry chimin a chhilh zat hi mi 12 an ni a, an zinga 8 te ruang hmuh a ni tawh a, mi 4 te hi zawn mek an ni. Leiminin a chhilh mi 4 te hi ABCI company hnuaia thawk an ni a, mi 8 hi contractor hnuaia inhlawh an ni thung. Ruang te hi post mortem turin Hnahthialah thawn an ni. Leiminin khawl a chhilh zingah excavator 5, stone crusher 1 leh drilling machine pakhat a tel.
Hnahthial District Disaster Management Authority in thil thleng a hriat veleh Executive Magistrate pahnih a hmunah a tir nghal a; police, medical team, ambulance leh disaster vehicle leh hmanrua te nen a hmun rang takin an thleng a. Leimin zau zawng hian 5000sqm vel a awh niin an report. Officer 2 kaihhruaiin National Disaster Response Force leh State Disaster Response Force tangkawp ten rang takin hma an la nghal a. DC/DDMA, Lunglei District pawhin Hnahthial team te thlawp turin doctor 2, staff 8 leh ambulance 2 bakah QRT team a tir bawk a ni. Aizawl atangin Joint Director (Operation), DM&R pawh a rang thei ang berin a hmunah a thleng phei a. A chhehvel khua atangin mimal tlawmngai engemawzat an pungkhawm a, ruang an lakchhuahte tuamhlawmin tlawmngai pawl ten kuang an siamsak a ni.
He chhiatna rapthlak tak thleng hi Mizoram Sawrkar chuan pawi a ti tak meuh a. Ruang zawn hna hi thawh mek a ni a, hmuh kim an nih hma chu kalpui tur a ni. Ruang zawn hna thawktu mi tlawmngaite hman turin DM&R Minister Pu Lalchamliana chuan cheng 20,000 a pe a ni.
