1158/2023-2024

Aizawl, the 17th July 2023: Vawiin chawhnu khan Pu C.Lalrinsanga, Agriculture Minister kaihruaina hnuaiah Mawmranga Organic FPC leh NHAR Organic Pvt Ltd, Guwahati te chuan Contract Farming atan thawhhona thuthlung an ziak.

Mawmranga Organic FPC leh NHAR Organic Pvt Ltd te thawhhona MOU ziahna hun hi Agriculture Minister Pu C.Lalrinsanga chuan a kaihruai a. He hunah hian Agriculture Minister chuan tunhnai maiah Haulawng lama Mizo Hmarchate tharchhuah te USA-ah hlawk takin hralh a ni tawh tih Minister chuan a sawi a. Hetiang ang hian Kuthnathawktute thawhrimna rah hlawk zawka sum a chanter turin sawrkarin hma a la chho mek zel a. Thlairah dangah te pawh Contract Farming hi kalpui chhoh zel tumna a awm a, hma pawh lak mek zel a ni a ti. Agriculture Minister chuan a mimal anga thlai thar te hralh ai chuan Cooperative Movement hnuaiah hetiang anga kuthnathawktute thawhhona leh tanrualna hian awlsamna kawngtam taka a siam a. A hlawk zawk tih a sawi bawk.

Contract Farming a thawhhona thuthlung hi Agriculture Minister Office Chamber-ah ziah a ni a. Mawmrang Organic FPC aiawhin Nula Brenda Lalrinsiami, CEO leh NHAR Organic Pvt Ltd aiawhin Pu Mirdul Sharma ten MOU-ah hian hming an ziak a. Pu Sanjay Kumar, Clover Organic Pvt Ltd leh Pu Chinmoy, PMU, MOVCD( NER ) te chu hriatpuituah an tang a ni. He inremna thuthlung ang chuan Mawmrang Organic FPC hnuaia kuthnathawktu chhungkaw 100 tena kumkhat chhunga Chhibung( White Sesame) an thar chhuah hi a tlem berah 60 Metric Ton emaw a tam lamah 100 Metric ton chu NHAR Organic Pvt Ltd te hian an leisak dawn a ni.

Mawmrang Organic FPC hnuaiah hian Pawlrang, Khawkawn, Changzawl leh Lamzawl khuaa kuthnathawktute an thawkho a ni. MOU ziahna hunah hian Pu James Lalsiamliana, Director, Agriculture Department & Mission Director, MOM leh Pi Lalnunpuii Parte, Deputy Director, Agriculture & State Coordinator, MOM ten thu an sawi bawk a ni.