1159/2023-2024

New Delhi, 17th July, 2023 : Dr R. Lalthangliana, Health & Family Welfare, Commerce & Industries leh Higher & Technical Education changtu Minister chuan vawiin khan thil pawimawh chi hrang hrangah sawrkar laipuia thuneitu sangte a dawr.

Dr Thangtea hian vawiin chawhma khan Ministry of Home Affairs hnuaia Department of Border Management Secretary Atal Dulloo, IAS chu a pisa ah kawmin Kawrpuichhuah Integrated Check Post (ICP) tihpuitlinna tur a sum ruahman tawh cheng vaibelchhe 552 chu central cabinet pawmpui tura chhawp chhuak thuai turin a nawr a, Atal Dullo chuan kar hnih vel chiah tuna a hna hi a la thawh avangin a la thar deuh thu minister hi lo hrilhin uluk taka a lo zirchian tur thu leh a theih anga ranga lo bawhzui a tum thu in a lo chhang a ni.

India leh Myanmar insumdawn tawnna hmunpui Land Custom Station (LCS) Zokhawthar leh Zorinpui chu India rama LCS project 20 thlan zinga tel a nih avangin a pawimawh hle tih Dr Thangtea hian sawiin Border Management Secretary hnenah hian hemi atana Detailed Project Report (DPR) siam chu tih thuai a ngai tih a sawi a, a rang thei ang bera buaipui turin a ngen a, theihtawp chhuaha lo enzui a tum thu in a lo chhang a ni.

Hemi hnu hian Minister Dr R. Lalthangliana leh Rajya Sabha MP Pu K. Vanlalvena ten Border Roads Organization Director General Rajeev Chaudhary chu a pisa-ah kawm bawkin Lunglei leh Lawngtlai district inkalpawhna atana pawimawh tak Tuipui ‘D’ Darzo kai lei dawhna tur cheng vaibelchhe 91 chuang saction awm tawh chungchang an sawipui a, Pu Rajeev hian a tul ang angte an buaipui fel tawh thu leh thuneitu sang lamah an thlen mek thu sawiin thla thar August kar hmasa ber a ral hma in engkim an tihfel theih a inrin thu in a lo chhang a.

Minister hian Thingsai - Pangkhua inkalpawhna defence road BRO hovin an laih mek chu kilometre 21.38 hmabak a la awm tih a thlen a, Pu Rajeev hian National Highway single lane angin an chhunzawm tur thu leh hemi atan hian Ministry of Defence chuan cheng vaibelchhe 111 a ruahman tawh thu lo sawiin, thla 6 chhungin DPR peihfel tum a nih thu leh working season tharah hna thawh tan hman tumin an inruahman tih a lo sawi a ni.

Dr Thangtea hi Delhi ah a la cham chhunzawm dawn a, ruahman lawk ang chuan naktuk hian Asian Development Bank (ADB) hotute leh Ministry of Human Resources Development (MHRD) a dawr ang.