690/2025-2026

Lunglei, 2025 Ṭomir thla ni 31: Nimin, May ni 30, 2025 aṭanga chawl mang lova ruah sur chuan Lunglei District chhung hmun hrang hrangah chhiatna a thlen a. Lei min leh thli tleh avanga in chhia leh dinhmun hlauhawma awm eng emaw zat awmin, chhungkua eng emaw zat hmun him zawkah an inthiar chhuak a; he’ng chhiatna thleng avang hian thi leh hliam erawh an awm hriat a ni lo. 

Lungleia District Emergency Operation Centre (DEOC) chu darkar 24 chhung tihnun niin, District Disaster Management Authority (DDMA) Chief Executive Officer, Additional Deputy Commissioner Pi Rochuangkimi Khenglawt hovin chhiatna thleng hrang hrangte hi vil reng a ni a. District thuneitute, Zonal Officer-te, DM&R official-te leh Quick Response Team te chu hmun hrang hrangah feh chhuakin, harsatna thlenna hmunte hi an tlawh a, Village/Local Disaster Management Committee (V/LDMC), khawtlang hruaitute leh tlawmngai pawlte nen chhawmdawl leh ṭanpui hna an thawk a ni. 

Hriat theih china Lunglei District chhunga chhiatna thleng, DEOC/DDMA-a report lutte:

May ni 30, 2025:

Lunglei Chanmari leh Farm Veng: Chanmari leh Farm veng inkal pawhnaah thingkung tluin electric hrui vaw chhiain, kawng a dang ping a. PWD leh khawtlang mi tlawmngaite’n kawng hi an thian fai a, a tlang leh thei nghal a ni. Lei minin Farm Veng thlanmual kawng a hnawh a, then fai nghal a ni bawk.

Bualte: Lunglei – Lawngtlai kawng (NH-54), Bualte aṭanga KM 4 velah lei min leh chirh tawlhin kawng a hnawh a. NHIDCL-te hriattir niin, an thian fai nghal a ni.

Sekhum: Sekhum khuaah lungrem chim avangin Pu Laldawngliana in dinhmun hlauhawmah a ding a, polytarpaulin-a khuh a ni.

Theiriat: Theiriatah lungrem chim leh lei min avangin Pu Ropuia in chu chim mai hlauhthawnawm dinhmunah a ding a. Mihring hliam erawh an awm lo.

Lunglei Electric Veng: Electric Vengah Pu C. Lalramtiama in bulah leh Mandir bulah lei a min a. Polytarpaulin-a khuh a ni.

Bunghmun: BCM Biak In lungrem a chim a. Polytarpaulin-a khuh a ni.

Hlumte: Thli tlehin Pi Lalchawimawii in (kutcha house) a tihchhiatsak.

Zobawk leh Dawn: Zobawk leh Dawn khaw inkarah lei minin NH-54 kawngpui a hnawh a, NHIDCL leh PWD te’n an thian fai nghal.

Mamte: Thli tlehin Pu H. Lalramnghaka in (assam type) chung a tichhia.

Sazaikawn: Sazaikawn bulah lei minin kawng a hnawh ping a, NHIDCL leh PWD te’n an thian fai nghal.

Lalnuntui leh Lungrang: Lalnutui leh Lungrang khaw inkarah lei min vangin kawng a bal ṭhen a, PWD lam hriattir niin, hma lak nghal a ni.

Tlabung leh Zohmun: Tlabung leh Zohmun inkarah hmun thumah lei minin kawng a hnawh a, PWD te’n JCB nen an thian fai nghal a ni.

Lunglei Venglai: Govt Middle School, Venglai bulah lei minin, polytarpaulin-a khuh a ni.

Tleu: Hmun ṭhenkhatah lei minin, polytarpaulin-a khuh a ni.

Ṭawipui South: Thli tlehin Pu Lalfakzawma in a tichhia.

Haulawng: Hausiampa Hall bulah lungrem a chim.

Vanhne: Vanhne Dinthar Vengah lei minin kawng a hnawh a, then fai nghal a ni.

Hlumte: Thli tlehin thingkung a len thlukin electric ban a delh thlu a. Then fai leh siam ṭhat hna thawh nghal a ni.

Runtung: Thli tlehin Pu Lalsangzuala leh Pu Laldinliana te in a tichhia.

Thingfal: PCI biak in bula lungrem a chim.

Puankhai leh Devasora: Puankhai leh Devasora inkarah lei minin kawng a hnawh a, PWD te’n then fai hna an thawk nghal. 

May ni 31, 2025:

Ṭawipui North-I: National Highway chhak lei minin Pu Lalthuthlungngheta te in chu dinhmun hlauhawmah dahin, an chhungkua an inthiar chhuak.

Bunghmun: Hmun hrang hrangah lei a min a, chhungkaw panga chu an chenna in aṭangin hmun him lamah an inthiar chhuak. Bunghmun thlanmual nasa takin a min bawk a. Thlan eng zat nge a minpui hriat theih a la ni lo.

Ramlaitui: Pu Vanlaldika in bula lei min chuan an in chu dinhmun hlauhawmah dahin, an chhungkua hmun himah an inthiar chhuak.

Theiriat: Lei min leh lei khi avangin Theiriat kawng chung kawng khar rih a ni a. Lei min vanga an chenna in dinhmun hlauhawma a awm avanga inthiar chhuak an awm bawk.

Hmuntlang: Lei min leh chirh tawlh nasa avangin Hmuntlang panna kawng a ping a, then fai hna thawh nghal a ni.

Lunglei Farm Veng: PWD Road Pi Vanhlupuii in bulah lei a min a, polytarpaulin-in khuh a ni.

Sekhum: Lei min vangin chhungkaw thum – Pi Lalhmingliani, Pu C. Hrangvunga leh Pu Lalhmunmawia te chhungkua chu an chenna in aṭangin hmun him zawkah an inthiar chhuak.

Lungrang South: Lei minin kawng hnawhin, then fai hna thawh nghal a ni a. A kianga chenna in chu dinhmun hlauhawmah a awm bawk.

Lunglei Rahsiveng: Rahsiveng aṭanga Vanhne panna kawngah lei minin kawng a hnawh a, then fai hna thawh nghal a ni. Govt PS-2 bulah lei min awm bawkin, then fai a, khuh a ni.

Lunglei Chanmari: WADA De-Addiction Centre bulah lei a min a, polytarpaulin-a khuh a ni.

Lunglei Bazarveng: Parallel Road-ah lei minin kawng a hnawh a, then fai hna thawh nghal a ni.

Haulawng: Lei minin Pu Ramengmawia furniture workshop a chhilh a; mihring thi leh hliam erawh an awm lo.

Chawngte L: Lei minin Pu Manghenga in a tichhia.

Hauruang: Hauruang Riangvaite Thlanmualah nasa takin lei a min a, thlan eng zat nge chhia hriat a ni lo.

Lunglei Lunglawn: Kawngah lei khi leh lei tla hniam a awm a, polytarpaulin-a khuh a ni.

Lunglei Zohnuai: Hmun hrang hrangah lei min a awm a, a theih ang angin polytarpaulin te’n khuh a ni. Pu PL Hmingsanga te chhungkua hmun himah an inthiar chhuak.

Serkawn: Hmun hrang hrangah lei min a awm a, a theih ang anga khuh leh then fai hna thawh a ni. Pu NT Hrangkima te chhungkua chu an chenna in dinhmun hlauhawma a awm avangin hmun himah an inthiar chhuak.

Thenhlum leh Bolia: Thenhlum leh Bolia inkar hmun ṭhenkhatah lei minin kawng a hnawh a, then fai hna thawh mek a ni. Bolia-ah tui lian avangin chhungkaw pathum hmun himah an inthiar chhuak.

Lunglei Venghlun: Pu R. Lalmalsawma in bulah lei a min a, polytarpaulin-a khuh a ni.

Zehtet leh Mautlang: Zehtet leh Mautlang inkarah lei minin kawng a hnawh a, then fai hna thawh mek a ni.

Lunglei Ramthar: Pu Rengkawma leh Pu Chalmanga te in leh CRC building bulahte lei a min a, polytarpaulin-a khuh a ni. Ruah sur nasa avangin Christ Redemption Church biak in chhungah tui lutin, tui a tling bawk.

Pangtlang: Pangtlangah lei minin kawng a hnawh a, then fai hna thawh mek a ni.

Tlabung: Khawthlangtuipui tui chim chin a sang zel a. Chenna in ṭhenkhat tuiin chimin, chhungkaw pahnih hmun himah an inthiar chhuak tawh.

Lunglei District thuneitute chuan ruah sur avanga chhiatna hrang hrang thleng thei lakah mipuite fimkhur turin an chah a. Chhiatna leh harsatna thlengte a rang thei ang berin mahni bialtu Zonal Officer hnenah emaw, District Emergency Operation Centre-ah emaw hriattir ṭhin turin an chah bawk. DEOC hi eng tik lai pawhin he’ng number-ahte hian biak pawh theih reng a ni: Landline – 0372-2323635; Toll Free No – 1077.