8th Batch Bru Repatriation atana inbuatsaihna kal zelah vawiin khan Kolasib District Bawrhsap Pu H.Lalengmawia, IAS chuan a pisa-ah Mizoram Bru Displaced People Forum (MBDPF) hruaitute a kawm a. Reang(Bru) ten Mizoram an rawn let huna an awmna tur Mizoram sorkarin Kolasib District-a a ruahman sak te a hmun ngeia en an dil angin MBDPF hruaitute hi entir nghal an ni.

Pu H.Lalengmawia chuan Mizoram mi Reang (Bru) Kolasib District-a lo let tur te chu thinlung takin District in an lo lawm thu sawiin, kim taka an lo let a beisei thu a sawi a. Mizoram sorkarin ruahmanna tha tak nen an lo let theih nan a inbuatsaih thu sawiin, thlamuang taka lo let turin a sawm a ni.

MBDPF hruaitute hi Pu R.Laldawngliana, Vice President MBDPF in a ho a. Pu Lalnunfela Chawngthu, ASO, Kolasib leh Pu Lalrinawma Khiangte, SDC Kolasib ten MBDPF hruaitute hi an chenna tura ruahman te a hmunah kalin an enpui a ni. Tarlan tawh angin Kolasib District a Reang (Bru) let tur beisei zat hi chhungkaw 628 niin, khaw pariat ; Bairabi, N.Thinglian, Dilzau, Zodin (Rastali), Meidum, Pangbalkawn, Bukvannei leh S.Chhimluangah chentir an ni ang.

Attachment

  • Loading attachment...