No.30/2021-2022

Aizawl, the 6th April 2021: Mizoram Board of School Education buatsaihin High School Leaving Certificate (HSLC) leh Higher Secondary School Leaving Certificate (HSSLC) Examination 2021 chu centre hrang hrangah kalpui mek a ni a. Vawiin khan HSSLC Examination bik chu Centre hrang hrangah tan a bawk ni.

Tun thla ni 1-a exam tan HSLC Exam-ah centre 116 a awm a, candidate 18,738 an awm a, nikum aiin 144 in candidate hi an pung a. High School 679 atangin zirlaite hi an exam a, tun thla ni 15 ah zawhfel a ni ang. Result hi June chawlhkar hmasa berah tihchhuah theih beisei a ni.

Vawiina tan HSSLC exam-ah hian centre 86 an awm a, candidate 11,849 kum hmasa aiin 760 in an tlem thung. Higher Secondary School 186 atangin an exam a ni. HSSLC Exam hi tun thla ni 30-ah zawh a ni ang a, HSSLC result hi June chawlhkar hnihna emaw thumnaah emaw chhuah theih beisei a ni.

HSLC leh HSSLC Examination atan hian Centre thuneituten hri inkaidarh a awm loh nan uluk takin thil an kalpui a ni. kum 2020-2021 academic session-ah COVID - 19 hri leng avangin rei tak school khar a ni a, class a pangngaia kalpui theih a ni lo va. Hetiang anih avang hian mi tam takin kumin Board exam chu kum dang aia strict lo emaw, ngaihhnathiamna tam deuh turah emaw lo ngaih theih te pawh a ni. Amaherawhchu, COVID - 19 hri leng avanga zirlaiten harsatna an tawh lohna turin Mizoram Sawrkar leh MBSE chuan theihtawp chhuahin hma a la a. Chung zinga thenkhatte chu hengte hi an ni:

(1) MBSE chuan syllabus chu zaa sawmthum (30%)-in a titlem. Hei hi India ram hmun danga an tih dan a ni a. CBSE leh State Board dang zawng zawng pawhin an tihdan a ni.

(2) Examination Scheme pawh ennawn a ni a, zawhna chhan awl chi (easy question) 10% laia tih tam a ni bawk.

(3) Zirlaite an lo inbuatsaih thiam theih nan Sample Question Paper (SQP)

subject zawng zawng tan siam a ni bawk.

(4) School khar ni mah se zirna kalpui reng tho a ni a. MBSE chuan Week-wise Plan, zirlaiten kartina an zir tur kawhhmuhna leh kaihhruaina a siam a. Kar (week) 16 daih siam a ni a, July - October, 2021 chhunga an zir tur siamsak a ni.

(5) School Education leh SCERT te Youtube Zirna huang channel bakah leh Tutorial class TV programme hmangin April 2020 atanga March 2021 chhungin DDK,Zonet leh LPS ah te nitin zirtirna pek reng a ni bawk.

(6) Tin, telephone hmanga an zirtirtute an rawn theihna turin ruahmanna siam a ni bawk a ni.

(7) School-ah rawn theihin zirtirtute an lo awm thin bawk.

COVID - 19 avangin zirna inte khar ni bawk mah se, Sawrkar chuan a tih tur turte a theih angin a hlenchhuak tawh a. Chuvang chuan HSSLC leh HSLC Examinations, 2021 pawh hi dik leh felfai takin, kum dang ang bawka strict-in buatsaih mek a ni a. Zirlaite pawhin tha taka Board Exam hi an zawh theih beisei a ni.