No.31/2021-2022

Dated Champhai, the 6th April, 2021: Vawiin chawhnu khan A.H & Vety. Department Champhai buatsaihin Champhai District chhung Myanmar ramri depa awm Tlangsamah ramri kaltlanga ran natna inkaichhawn theih hrang hrang chungchang inzirtirna neih a ni.

Zirtirna petu Chief Veterinary Officer (CVO) Champhai Dr. C. Lalsawithuama chuan tun hnaia Lunglei District Lungsen khuaa vawk pul hri leng chu Mizorama Vawk natna leng thin a ni lo tih finfiah tawh a ni a, African Swine Fever (ASF) a ni ngei em tih erawh chu finfiah la ni chiah lo mah se, rinhlelh a nih thu a sawi a. Vawk zinga a vei za a za (100%) in an thihpui African Swine Fever a lo nih palh chuan Mizoram tan thil pawi tak a ni thei dawn a ni, a ti a. Vawk leh vawka inkai aiin minringin an theh darh a tam zawk tih tarlangin, fimkhur taka hmachhawn a ngaih thu a sawi a. Vawk hri laka invenna turin sawrkarin theihtawp chhuah thin mah se, sawrkar chauh chuan a ven sen loh thu sawiin, khawchhak atanga vawk natna hri a lo luh lohna turin ramri daido khuate tanpuiah kan sawm che u a ni, a ti.

He hun hi Pu Vanchhunga Tlau, Tlangsam VCP chuan a kaihruaia, vawk natna a len thulha invenna tur hrang hrangte kalkhawmte hrilhfiah niin, mahni vawk in theuhte pawn lam mi tlawh tir lo turte, vawk damlo an awmin khung hran vat tur te, vawk in tih thianghlim dan leh damdawi hman tur hrang hrangte bakah vawk thi sawngbawl dante VC member, vawk vulhtu leh NGO hruaitute zirtir an ni.

Champhai District Magistrate Pi Maria C.T. Zuali chuan thenawm ram leh state-a leng mek African Swine Fever (ASF) laka Champhai District a him theihna turin ram dang leh state dang a?anga vawk, vawksa leh vawksa atanga siam lakluh khapna thupek chu thla hnih chhung awh turin February Ni 22, 2021 khan a lo chhuah tawh a. Thupek chuan Champhai District chhung khaw pakhat atanga khaw danga vawk lalut emaw phur chhuak tur chuan A.H & Vety. Department atangin permit lak hmasak a tul thu leh permit la tur hian VCP, YMA leh A.H & Vety Department Staff, A.H & Vety Department awmlohna hmunah Community-Based Animal Health Workers (CAHW) te hnen atangin hriatpuina lak hmasak a tul thu a tarlang bawk.

A.H & Vety. Department Champhai chhinchhiah danin tunhnai kum khat kalta chhung khan ramri kaltlanga dan lova vawk lakluh 122 man a ni tawh a. Sample 113 test tawh niin, Porcine Reproductive and Respiratory Syndrome (PRRS) vei 50 hmuhchhuahte dan anga tihhluma phum an ni a. African Swine Fever (ASF) vei erawh hmuh a la ni lo. A.H & Vety. Department chuan vawk vulhtu zawng zawngte theihtawp chhuaha fimkhur tur leh bio-security zawm tha turin a ngen a. Vawk damlo rinhlelhawm an awm a nih chuan a ranglama A.H &Vety. Department thawktute hriat tir nghal vat turin a chah a ni.