Vawiin khan Mizoram Board of School Education(MBSE) chuan kumin February leh March thla chhunga neih,  High School Leaving Certificate Examination, 2018 result a tichhuak a. Exam beitu zirlai zawng zawng zinga 76.65 %  te chu Exam passed a puan an ni. 

HSLC Examination 2018  hi zirlai 18,335/ in an bei a; heng zinga mi 13,563/ te an hlawhtlin laiin mi 3787 an hlawhchham a; mi 345 chu Compartmental Chance pek niin an failed na subject-ah te an exam tha leh thei dawn a ni. HSLC exam beitu zingah hian hmeichhia tam zawkin mi 9547 an ni a, mipa zirlai HSLC eaxm beitute erawh chu 8788 an ni thung. HSLC Exam Result in a tarlan dan chuan Zirlai hlawhtling zingah hian Distinction  1068, I Division 3725, II Division 5107 leh III Division  3663 an awm a ni.

District pariat zingah Siaha District atanga Regular candidate te an pass percentage a sang bera 86.26% a ni a, Lawngtlai District  atanga exam te zinga pass percentage chu a hniamber niin 59.15% a ni.  Enkawltu hrang hrang hnuaia pass tam dan MBSE Result bu in a tarlan dan chu -  Government Schools 72.07 %, Deficit Schools 92.55%, Aided Schools 73.25%, Lumpsum Schools 81.46%, Private Schools 79.91% leh mimal anga Exam beitute 51.98% a ni. Hetih lai hian Sikul 105 te chuan 100% pass percentage an neih laiin Sikul 15 atanga candidate te chu vanduai thlak takin an hlawhchham vek a ni. 

MBSE HSLC Examination 2018 Results chhuaka a thiam filawr, Top 10 te chu -

Pakhatna : Mark 477 hmutu Lalremsiama Darchhun, St Paul's HSS leh Royal Philem, Mount Carmel School,

Pahnihna: Mark 470 hmutu Lalrinnungi, St Paul's HSS leh Lalrintluanga, Baptist Higher Secondary School, Serkawn,

Pathumna : Mark 469 hmutu Merilyn VL Hriatpuii, St Joseph HSS, Aizawl leh John Malsawmsanga, Don Bosco School, Darlawn,  

Palina : Mark 468 hmutu Lalthlamuanpuii, St Paul's HSS leh Swagatalokhi Bhattacharya, Sacred Heart School, Lunglei,

Pangana: Mark 467 hmutu Nicky Lalnunmawia, Mount Carmel School,

Parukna : Marck 466 hmutu Lalmalsawma, St Paul's HSS,

Pasarihna : Mark 464 hmutu Rosangzuala Ralte, Home Mission School, Aizawl,

Pariatna : Mark 463 hmutu Lawmsangzuali, St Paul's HSS,

Pakuana : Mark 460 hmutu JK Malsawmzeli, Presbyterian English School, Khawzawl Vengthar

Sawmna: Mark 459 hmutu Lalhriatpuia Sailo, Sentea Memorial High School, Aizawl, Ruthi Malsawmzuali, St John's HSS, Kolasib leh Garry Malsawmhlua Rokhum, Snow White High School, Lungdai te an ni