Fisheries Department, Serchhip District ten Sangha chi intodelh tura beihpui an thlak kal zelah vawiin hian Pu F. Lalrindika, Thenzawl chuan ama siam sangha chi (Common Carp) chu Thenzawla mamawhtu engemawzat hnenah a hralh chhuak. 

Pi Zonuntluangi, District Fisheries Development Officer, Serchhip District chuan he hun hi a hmanpui a. Fisheries Department, Serchhip chuan Sangha chi a intodelh tura beihpui an thlak mek ah ni 8^th February, 2018 khan sangha chi siam chhuak thei tur mi bik thlan bik te hnenah, a lem nena entirin zirtirna uluk takin an lo pe tawh a, an hmalakna bawhzuiin Fisheries Technical miten uluk taka enzuiin an vil zui thin a ni, a ti a. Sangha khawituten taima taka an hnathawh rah hralh chhuah tur hial an nei ta chu lawmawm atih thu a sawi a. Serchhip District chhunga Sangha chi (Common Carp) chi siam dan an zirtir zinga midangte pawhin Sangha chi hi siamin a mamawhtu te hnenah an la hralh chhuah leh thuai tur thu a sawi bawk. 

Pu F. Lalrindika hian Fisheries Department, Serchhip District ten Sangha chi siam dan zirtirna an pek atanga Sangha chi hi siamin, sangha pui 4 a tui tir atangin athawh khatna atan sangha note 2000 vel a hralh chhuak a, Thenzawla sangha khawitute mamawh phuhruk theih ngei a in beisei.