Vawiin khan Mizo Cultural Organisation (MCO) chuan an pawl General Assembly vawi 9-na chu Archives Hall, Babutlang, Zarkawt-ah an hmang a, he hun hi Pu Vabeiha Hlychho, Director, Tourism Department chuan a hmanpui. Kum 2014 - 2016 chhunga an pawl hruaitu thar thlanna an nei bawk a ni.
Pu Vabeiha Hlychho chuan Mizo hnam ziarang hrang hrang humhalh kawngah te, Zo zemawi hrang hrang chawinung kawnga te leh thangthar te hnena Mizo nun hlui pholanna leh entirna kawngah te MCO chuan an thawhhlawk hle a ni tiin Mizo culture humhimna kawnga an thawh nasat thu a sawi bawk. Khualzin hipna kawngah culture chu hmanraw pawimawh tak a nih thu sawiin chutiang rilru pua, hmalak chhoh a hun tawh a ni, a ti bawk. Tourism Department chu culture vawn kawnga hnathawk thin a nih thu sawiin hetih rual hian Department anga hma an lakna kawngah tun aia hma an sawn zawk theih nana MCO te chu thawhpui zel tur a a duh thute a sawi bawk a ni.
He inkhawm hi Pu R Liandawla , President MCO General Headquarters chuan kaihruaiin Dr. Rosangliani, Executive Committee Member, MCO General Headquarters-in hunserh a hmang a ni.
Mizo Cultural Organisation inkhawmpui ah hian thurel tur Agenda paruk lai chhawp chhuah a ni a, chung zing ah chuan MCO Gen. Hqrs. hmingin hmun hma neih ve nise tih te a tel a, chung bakah chuan kan hnam rohlu, incheina leh puan chi hrang hrangte Originality leh neitu nihna humhalh leh vawng nunga hma la turin sawrkar-ah thlen ni rawh se tih leh thil pawimawh tak takte he khawmpui ah hian an sawiho a ni.
