Mizo Acamdemy of Letters, Sahitya Academy leh Agartala a, North East Centre for Oral Literature (NECOL) buatsaihin vawiin khan MBSE Conference Hall, Chaltlang-ah Mara tawng zirhona “Symposium on Mara Language” neih a ni a. Nileng awh he zirhona hi Art & Culture Minister Pu R. Romawia’n a  hawng a ni.

Pu R. Romawia chuan Mizoramah hnam leh chi hrang, tawng heang hrang hmangte kan cheng khawm a. Tawng hi Midang nena kan inbiakpawh leh inhriatthiam tawnna hmanraw tha a nih rual in, chi leh chi, hnam leh hnam inkara indaidanna bang siam pawh a ni thei, a ti. Mara tawng hi Tibeto-Burman hlawm lian tak hnuaia Kuki-Chin tawng hlawm zinga mi niin Lusei tawng nen pawh a in hnaih hle, a ti a. tawng hi mihring siam chawp nilovin Pathian min pek a nih angin a thih lohna tura humhalh leh vawn nun hi kan tih tur a ni a, min thendarhtu nilovin min phuarkhawmtu atan kan hmang zawk tur a ni, Art & Culture Minister chuan a ti bawk.

Mizo Academy of Letters President Pu Lalthangfala Sailo kaihhruai he Symposium ah hian I&PR Director Pu Jim K. Chozah pawhin thu sawiin Mara hawrawp lo chhuahna leh Lusei tawng nena a danglamna te a tarlang a. Mara hawrawp chu Sap hovin Roman Script atanga an siam a ni a, ziaka dah hmasa ber tu chu 1852-ah Capt. S.R. Tickell a ni a ti.

Kalkhawmte lawman thu sawitu NECOL Director Pi Minakshi Sen Bandyopadhyay chuan Sahitya Academy leh Necol hnathawh dan leh hmarchhak state hrang hranga zirhona an buatsaih thin dante sawifiahin hnam hrang hrangte chen hona India ramah a hmangtute an tlem avanga tawng lar ta lo leh thi mai tur nia langte humhalh an tum a. He tawng thi mai tur a langte chawilar tur leh ziaka vawng tha a, humhalh turin mithiam leh zirlai kalkhawmte a sawm a ni.

Symposium ah hian Govt. Saiha College Associate Professor pathum - Benjamin Francis Nohro, Thasia T. Ayzu leh Dr. Chawngkhuma Chawngthu bakah Fisheries Department Joint Director (Rtd.) Pu Heili T. Ayzu te paper buatsaih chu ngaihthlak leh zirho a ni.